Dang bishar ia ka jingdawa thung kynhun tohkit halor ka jingiakynad ha Garo: Conrad

U Myntri Rangbah ka Jylla Conrad K Sangma hynne ka sngi ula pynpaw ba ka Sorkar Jylla kan sa shong bishar ia ka jingdawa ban thung ia ka kynhun tohkit ba laitluid halor ka jingkulmar ba jia dang shen ha ri-lum Garo.

Lah ban kdew na ka liang u nongialam ka Liangpyrshah u Dr Mukul Sangma dang shen ula thoh sha u Myntri Rangbah ban thung kynhun tohkit ba laitluid halor ka jingïakynad da kaba kynnoh ba ki bor Pulit ki shu kem kulmar ia ki samla, khlem ki sakhi sabut.

Lah ban kdew ba ka jingïakynad ka la mih ha rilum Garo namar ka jingpyrshah ia ki bar jylla ban iashim bynta ha ka ilekshon Garo Hills Autonomous District Council (GHADC).

Haba kren sha ki lad pathai khubor u Conrad ula ong, “U Nongialam ka Liang Pyrshah u Dr Mukul Sangma ula kren bad thoh sha nga ha kine ki khyndiat sngi. Ki jingjia ba la jia bad ka ka jinglong jingman ba mih ka donkam ia ki kynja jingtohkit ba kan don ban tip ba kaei kaba lam sha kane ka jingkulmar bad mano ba donkti bad khamtam ka bynta ba shah pynjulor ki nongkynti paidbah, ki nongkynti ki riew shimet”.

“Hynrei kumno bad kaba kumno ka jingtohkit, ngin dang ban bishar namar hooid ngi la bun kam bad kane ka jinglong jingman. Kumta, ha kine ki sngi ban wan, ngin sa shim ia ka rai (halor ka jingthung ia ka jingtohkit)” ula ong.

Haba ia dei bad ka jingtohkit ia ka jingkem naphang ia ki briew hadien ka jingkulmar, u Conrad ula ong “Sa shisien, nga la kren shai ia kane ka bynta ba ka ain kan iaid la ka jong ka lynti. Ki Pulit ki ju shim ia ki sienjam halor ki sakhi katkum ka ain. Ngam lah ban kynthoh eiei halor kane, ka dei ka kam ki Pulit bad kam dei ia nga ban shong bad pule ia ki file bad ki jingtohkit”.

U la bynrap u SP bad u DIG lane DG kin biang eh ban ai ia ka jubab bad phi lah ban kylli na ki.