Buh thong ka Sorkar ban wanrah Film City ha Meghalaya

U Myntri Rangbah ka Jylla u Conrad K Sangma ula pynbna ia ka jingtyrwa jong ka Sorkar ban tei ia ka Film City bad ka Film Institute ha Meghalaya.

Ia kane u Myntri Rangbah ula pynpaw haba kren ha ka jingplie paidbah ia ka 1st Shillong International Film Festival kaba la long ha State Convention Centre Shillong.

Ia 1st Shillong International Film Festival la pynlong da ka Directorate of Information & Public Relation (DIPR) bad ha kane ka sngi la don lang u Myntri ka tnad IPR u Bah Lahkmen Rymbui, u Chief Secretary Dr Shakil P Ahammad, u Director ka IPR Bah BS Sohliya, ki nongshna phlim, ki actor aktres bad ki samla ba pule ia ka kam shna phlim.

Haba kren haka jingialang u Myntri Rangbah ula ong “Ngi sngew ba ka Film City kan ai ia ka nongrim ia ki artist bad ki nongshna phlim ba kin iohi ia ka Shillong bad ka Meghalaya kum ka jaka wan (destination) ha kaban shna phlim”.

U Conrad ula pyntip ruh ba ka dei shibynta jong ka jingthmu jong ka Sorkar ban don ia ka Film Institute bad ong “Lada ngi kwah ban long hakhmat ha ka kam shna phlim bad wanrah ia ki jingtei kiba donkam na ka bynta kane, ka long kaba kongsan ban don ia ka jingtip kaba bniah haka liang ki kor ki bor bad ka rukom shna ia ki phlim”.

U la ai ka jingiaroh ia ki nongshna phlim ka Jylla kiba la shna bad pynmih ia ki phlim bad ban sei ia ki sap rew bad namar ka jingieid ia ki phlim khlem kano kano ka jingioh jinghikai lane ka jingkyrshan pisa. “Ka long kaba kongsan ban wanrah ia ka jingtbit ha man ki bynta ha ka jingshna phlim” ula bynrap.

U Conrad ula pynpaw ruh ia ka jingsngew sarong ba ka Jylla kala lah ban pynlong ia ka 1st International Film Festival bad ong “Kane ka dei kaei kaei kaba ka Sorkar ka kwah ban leh la slem bha namar ki samla jong ngi ki dei kiba don bun ki sap hynrei kim ioh ia ka rynsan bad ka lad ban pyni iala ki jong ki sap”.

U la ong ba ka kolshor, ka pateng bad ka jingiathuh khana ka dei shibynta jong ka kolshor ka Jylla bad kdew ia shibun ki lad ki lynti kiba lah ban leh eiie ha ka karkhana shna phlim ym tang ia ki actor hynrei ia ki nongshna phlim, ki technician, choreographers, designers, musicians, transport operators bad kiwei kiwei.

“Wat lada ki don bun ki lad kiba lah ban leh eiei na ka bynta ki samla jong ngi, ka long ruh kaba kongsan ba ia ki khana jong ki briew jong ngi bad ka koshor jong ngi, dei ban iasam lang sha ka pyrthei baroh kawei” ong u CM.

U Myntri Rangbah ula pyntip ruh ba ka Sorkar kala trei shitom ban pynbiang ia ka rynsan ha ka rukom kaba dei da kaba shim ia ka lynti bala pyni da ki kynhun bapher bapher bad ban thaw ia ki rynsan bad ki lad ai jingkyrshan.

Ula pynkynmaw ba 50% na ki nong shong shnong ka Meghalaya ki dei kiba dang hapoh 20 snem bad kumta ka jingtynjuh ban ai kam aijam bad ban pynurlong ia ka jingangnud jong ki samla kan nang kynton ha ki snem ban dang wan.

“Kumta, ka long kaba kongsan ia ka Sorkar ban wanrah ia ki buit ba thymmai, ban leh experiment bad pyniar ia ki lad ki lynti” ula ban jur bad kdew ia ki sienjam bala shim da ka Sorkar kum ka jingkyrshan ia ki OTT Platform, busking hapoh ka MGMP, ka film policy jong ka Jylla bad kiwei kiwei.