Bun ki kren bein ia ka jaidbynriew Khasi hynrei ki pulit kim leh eiei

Ki paidbah khamtam ki dkhot jong ka seng Hynniewtrep Youth Council (HYC) lem bad kiwei ki sengbhalang hynne ka sngi ki la wan poi khrui sha Sadar Police Station, Shillong ban synran ia u President ka HYC bah Roykupar Synrem u ba dei ruh u chairman ka Confederation of Meghalaya Social Organisation (CoMSO), u ba shah khot hajir ha ki pulit.

Kane ka jingshah khot hajir u bah Roykupar Synrem ka long halor ka jingkren jong u dang shen ha ka jingialang ka CoMSO ha Motphran ha ka 11 tarik Lber 2026 ban ai ka jingkyrshan ia ka jingiakhih ki paidbah Garo pyrshah ia ka jingioh shim bynta ki bym dei riewlum ne Non-Tribal sha ka District Council.

Haba kren sha ki lad pathai khubor u bah Roykupar Synrem ula ong, ka jingshah khot hajir jong u ka dei halor ka jingkynnoh ba la saphriang ka jingkren jong u ba u pyniapher niam ha ka jylla bad ha ka ri India bad kawei pat ka dei ka jingkren jong u ba un leit iarap ia ki Garo lada donkam wat ban rah tiar bad kane ka long kumba wanrah ia ka jingthut ha ka shongsuk shongsain Katkum ka jingiathuh u bah Roy, ia kane ka ejahar ne FIR pyrshah ia u, la ujor da u SI u bah M. Khardewsaw jong ka Lumdiengjri PS.

“Katkum ka jingkynnoh ba la thoh ha ka ejahar, ka long ba ka la don ka jingpynsaphriang ha ki rynsan Social Media ia ki kyntien ba nga la kren ha ka jingialang. Kawei ka dei halor ka jingkynnoh ba nga pyniapher niam ha ka jylla bad ha ka ri India bad kawei pat ka dei ka jingkren jong nga, lada ki para riewlum Garo ki donkam ia ngi ki hynniewtrep, ngin don ha syndah bad ki, lada donkam wat ban rah tiar ruh,” ula ong bad bynrap ba ula pynshai ba um shym pyllong ia kano kano ka prokram ban iarah tiar rah tar ne ban rah ki tiar pynsynsaw.

Halor kane, u bah Roy ula iathuh ba ki pulit ki la pynngat ia u hapoh kawei ka kyndon jong ka Section 196 (1) kaba ia dei bad ka jingpynshit lane ka jingwanrah ia ka jingbym shongsuk shongsain hapdeng ki ar tylli ki kynhun la ka long ha ka niam ne ha ka jaidbynriew.

U bah Roy ula ong ba ki don bun kiwei kiba kren bein ia ka jaitbynriew Khasi hynrei ki pulit kim leh eiei katba ia ki Khasi ki kloi ban shim kam.

Ula kyntu ia ka tnad pulit ba kam dei ban shah liang ban jied shiah tang iano iano hynrei dei ban leh kumjuh ia baroh.