Ka KHADC bad JHADC ki dei ban pynkylla ia ka AD Rule: TW Chyne

U Nongialam Liang Pyrshah ha Khasi Hills Autonomous District Council (KHADC) u bah Titosstarwell Chyne ula ong, ka por ka la dei ia ka KHADC bad JHADC kin pynkylla noh ia ka AD Rule ba 128 jong ka Assam-Meghalaya (Constitution of District Council) Rules, 1951.

Haba kren sha ki lad pathai khubor u bah Titos ula pynpaw ia ka jingkmen ia ka jingpynkylla ia ka AD Rules da ka GHADC kaba buh kyndon ba tang kiba don syrnod Schedule Tribe ki lah ban iakhun ilekshon wat la kam pat kdew satia ban khang ia ka hok thep vote ki bym dei riewlum.

“Ka KHADC bad JHADC ruh ka la dei ka por ban pynkylla tangba ki kyntien kim dei ki juh na kawei ka district council sha kawei pat,” ula bynrap.

U la ong ka Executive Committee barim ha u snem 2018, ka la dep pynkylla ia ka AD Rules jong ka Assam and Meghalaya Autonomous Districts (Constitution of District Councils) Rules, 1951 bad la dep phah sha ka sorkar jylla tang ba ka dang sahkut ha ka tnad District Council Affair (DCA) ka sorkar jylla.

U la ong ba kane ka shim por khlem pat ioh jingmynjur na u Lat namar ba la pynkylla lut ia baroh ka AD Rules, hynrei lada kane ka EC ba mynta ka donkam ban pynbeit biang, ka dei ban pan biang ia kaba la dep phah ka EC barim ha u 2018.

“Kane ka jingpynkylla ha katei ka por mynshwa kam dei tang ia ka kyndon 128 hynrei ka dei ia baroh ki bynta jong ki AD Rules. Imat lehse ka shim por ban wanrah jingpynkylla ia ka baroh namar kata ia mynta ka jingdawa ba kham kyrkieh ka long ban pynbeit shwa tang ia ka AD rule 128,” ong u bah Titos.

U bah Titosstar ula ong ba ka jingdawa kyrkieh ia mynta ka long ban pynkylla ia ka Rules 128 jong ka AD Rules ban khang lad ia ki bym dei riewlum ne non-tribal bad kiwei ki riewlum bym dei trai muluk ban iashim bynta ha ka ilekshon ka District Council kynthup ban thep bad ban ialeh ia ka ilekshon.

U bah Titoss ula ong, na ka liang jong ki MDC ka Liang pyrshah la shai ka sngi Thohdieng kin sa iakynduh ia u Chief Executive Member ka KHADC ban iakren halor kane ka mat.

Ula bynrap kane ka dei ka mat ba kongsan na bynta ka jaidbynriew, namar kata baroh ki MDC ha KHADC ki dei ban don ia ka jingiatylli bad kajuh ka jingmut, khlem da iawad burom.