Ai Ambulance bad skhim 5 lak u MLA, ha ka sngi plie ophis Ri Bhoi ShateiPresbytery

Ka long ka jingkmen bad ka jingai mynsiem ha kaba lyngba ka jingpynkhreh ban jam sha u snem ba 25 snem ban ai ka jingshakri Blei kaba kynja mynsiem, ka Ri Bhoi Shatei Presbytery mynta ka sngi ka la ioh ban plie noh ia ka ophis treikam jong ka bad ia ka Board of Music Institute ka ban long kum ka shlem ai jinghikai na bynta ki jingtem bad jingrwai ia kaba la pynieng ha ka shnong Pahamlapong, hajan Nongpoh. La wan ban plie pyrda ia kane ka ophis building kaba la tei ha ka jinglut kumba 61 lah tyngka, da u Bah Mayral Born Syiem, MLA ka Nongpoh Konstituensi, ha kaba la sakhilang ruh da u Bah Balajied Rani, MDC, u Rev SBN Teron, Moderator ka RBP Synod, u Tbn RR Pamshong, Moderator ka Ri Bhoi Shatei Presbytery, ki Pastor, Tymmen Basan bad kiwei kiwei.

Kaba la nangpynkmen bad wanrah ia ka jingphuh samrkhie ia ki bor ka Ri Bhoi Shatei Presbytery, ka long ba ha kane ka sngi, u MLA u la aiti ruh ia ka kali kit nongpang kaba la mang na ka skhim CMSDF 2024-2025 bad ruh ia ka mang pisa lane ka work order kaba 5 lak tyngka ban iarap na bynta ka jingpynheh ia ka office treikam jong ka Presbytery. Haba kren ha kane ka sngi, u Bah Mayral Born Syiem, kum u nongmihkhmat paidbah ka thain Nongpoh, u la pynpaw ia ka jingsngewkmen bad jingiaroh kaba khraw ia ki bor ba dei peit jong ka Ri Bhoi Shatei Presbytery kiba la nang iai treishitom ha ka kam shakri Blei ba kynja mynsiem bad ha kane ka jingpynkhreh ban jam sha u mawmer ba 25 snem ka la lah ban ioh pat ia ka shlem treikam wat hapdeng shibun ki jingeh kumba la pynpaw, hynrei u Blei um shem la iehnoh ia ka Presbytery bad ban iai kyrkhu tad haduh ban urlong ka jingangnud ban ioh ia kane ka ophis treikam kaba pura.

U la pynpaw ruh, ba nalor ba la ioh ban ai jingiarap lyngba kane ka kali kit nongpang lem bad ka song pisa ban iarap ia ka Presbytery, hynrei kum u nongmihkhmat u la kular ban iai don ha syndah ban iai tynrong lem ia ki jingdonkam kiba bun ban pyntyllun ia ki kam babha jong ka Presbytery.