Ai jinghikai ka NEIGRIHMS halor ki kyndon ka Biosafety

Ka Institutional Biosafety Committee (IBSC) NEIGRIHMS ka la pynlong ka prokram kaba jop halor ka phang “Biosafety regulations and their implications on Bio-medical research” ha ka 1 tarik u Naitung 2025. Ha kane ka jingïalang la ïashim bynta da palat spah ngut ki nongïashim bynta na ki tnad bapher bapher ha NEIGRIHMS. La pynlong ia kane ka prokram ban pynsngewthuh ia ki nonghikai, ki doktor ba la kham rangbah bad ki samla pule ba la pyndep ia ka jingpule ha NEIGRIHMS shaphang ki kyndon biosafety ha India, ka jingdonkam jong ki bad ka jingdonkam ban bud ryntih da ki riewstad saiantis kiba donkti ha kano kano ka jingit bniah ha ka bio-medical kaba kynthup ia ki khniang jingpang kiba lah ban pynlong ia ki jingpang ha u briew, u mrad bad ki jingthung.

U Director ka NEIGRIHMS, u Prof. (Dr.) Nalin Mehta, ha ka jingkren plie jong u u la kren halor ka jingdonkam jong ka biosafety na ka bynta ban pynthikna ïa ka jingkoit jingkhiah bad ka jingbit jingbiang jong ki nongtrei laboratory. U Prof. Mehta u la bynrap shuh shuh ba ka NEIGRIHMS ka shimkhia bha ha ka jingwad bniah & jingpynroi na ka bynta ka jingmyntoi jong ka imlang sahlang bad ka jingshngain ha ki jaka trei ha ka jingwad bniah ka long kaba kongsan tam ha ka pdeng jong ngi. U la ïaroh ruh ïa ka jingpyrshang jong ka Prof. Vandana Raphael, Chairperson, IBSC, NEIGRIHMS bad u Dr. Pranjal Pratim Saikia, Member Secretary of IBSC ha kaba pynlong ia kum kine ki jingialang bad ban kyntiew ia ka jinglong kaba iadei bad ka jingwad bniah hapdeng ki nonghikai & nongtrei jong ka jaka pule.

U Prof. Probodh Borah uba dei u Director jong ka Research (Veterinary) na Assam Agricultural University (AAU) u la batai shaphang ki jingma bapher bapher kiba lah ban mih haba trei bad ki khniang jingpang ba shyrkhei. U Prof. Borah u la pynksan ruh shaphang ka jingshngain ha ka kam jong ki nongwad bniah bad ki nongtrei ha ki laboratory bad u la batai bniah ia ki lad ki lynti kiba donkam ban iada na ka jingshah ktah khlem da thmu ha kum kine ki khniang jingpang. U Prof. Borah u la pynpaw shuh shuh ia ki kyndon ba la bthah da ka tnad Biotechnology, ka Sorkar India, ka tnad nodal kaba iadei bad ki mat biosafety ha ka ri, ban pynthikna ia ka jingpyndonkam kaba shngain bad ban iada na ka jingpyndonkam bakla ia ka jingstad r-DNA bad ki khniang jingpang kiba shyrkhei ha ki kam wad bniah bad pynroi. Ka long kaba kongsan ban tip ba ia ka NEIGRIHMS Institutional Biosafety Committee (IBSC) la thaw ha u snem 2024 bad la pynrung kyrteng ia ka ha ka tnad Biotechnology (DBT) hapoh ka tnad Science and Technology, Govt. of India.