Ai jingiarap u CM sha ki 60 tylli ki shnong ban pynitynnad ia ka Tura

U Myntri Rangbah ka Jylla u Conrad K Sangma hynne ka sngi, ula aiti ia ki ‘cheque’ sha ki 60 tylli ki shnong hapoh Tura lyngba ka Tura Beautification Project, ha ka jingialang kaba la pynlong da ka Tura Municipal Board ha District Auditorium, Tura. Haba kren ha ka jingialang u Myntri Rangbah ula ong, ba ka sorkar kiba dei peit, ki municipal bad ki shnong ki don ia kajuh ka thong ban pynkylla ia ka Tura sha ka jaka kaba khuid, jyrngam bad ka sor ba itynnad. “Ka jingthmu jong kane ka prokram mynta ka sngi, ka dei namar ba ka sorkar kam lah ban leh hi marwei, ngi donkam ia ka jingiadon bynta bad jingiashim bynta lang bad ban shim lang ia ka jingkitkhlieh na ka bynta ka bha ka miat jong ka sor Tura bad ki nongshong shnong ki jong ka” la ong u Conrad.

U Myntri Rangbah ula pynpaw ruh ha ka jingialang halor ki projek bad ki jingtei kiban dang wan ha sor Tura kaban kynthup ia ka Additional Secretariat, Tura Super Market Improvement Project, P.A Sangma Integrated Sports Complex, Tura, Pelga Tourism Circuit, Tura Convention Centre, Tura Youth and Cultural Centre bad kine baroh kidei kiba dang pynwandur, ka projek ban kyntiew shuh shuh ia ka jingpynbiang ia ka umbam umdih ha Tura, ka jingbuh ia ki Street Light bad CCTV bad kiwei kiwei. U la ban jur ia ka jingdonkam ban pynbha ia ka leit ka wan bad ai jingmut ba dei ban don noh da ki kali kiba iaid da ka bor jong elektrik hashwa ban long ka National Games 2027 khnang ba yn ioh ia ka National Games kaba jyrngam. U Myntri Rangbah ula ban jur ia ka jingdonkam ban don ia ki Childrens Park bad ki jaka kiba kylluid, ha kaba ki briew kiba la rangbah kin ioh ban iaid kjat bad ki jaka kiba lah ban kilan met bad kan dei ruh ka lad kaba ki khynnah bad kiba la rangbah kin ioh ban ia pynlut por lang ha kajuh ka jaka.

U la kyntu ia ka jingialang ban iashim bynta ha ka jingairong airup ne ka “Paint My City” project, ban pynitynnad ia ki shnong ki thaw bad ula kyntu ia ki nongshong shnong ba kin iatreilang bad  ka Sorkar ban wanrah ia ka jingkylla dur ia ka Sor Tura kum ka jaka kaba itynnad, jyrngam, kaba iai neh bad ka jaka kaba lah ban ia imlang. Ki 3 tylli ki shnong kiba la leh bha ki la ioh pdiang mar T.1 lak katba kiwei pat ki shnong ki la ioh T.70,000 bad ha kane ka jingialang la iadonlang ki heh ophisar jong ka bor pyniaid district bad Tura Municipal Board ryngkat bad ki dkhot jong ki Locality Development Committee.