Ai jingmut ka MSSASA ban thaw Policy pynskhem ia kam nonghikai SSA

Ki nonghikai SSA hapoh ka shatri Meghalaya SSA School Association (MSSASA) hynne ka sngi ka la dawa ïa ka Sorkar Jylla ban thaw Policy ban pynskhem ïa ka kam jong ki nonghikai skul SSA. Ïa kane ka MSSASA kala dawa haka jingïalang bala khot da u Commissioner and Secretary ka tnat Pule Puthi ka Sorkar Jylla u Vijay Kumar Mantri ryngkat ka jingdonlang jong u Director ka State Education and Literacy u Swapnil Tembe. Haba kren sha ki lad pathai khubor u President ka MSSASA u Bah Aristotle Rymbai u la ong ba ki jingai jingmut kidei hi kiba la rim bad kiba la dep ai shaka State Education Commission (SEC) sha u Myntri ka tnat Pule Puthi bad kumjuh ruh sha ïa u Myntri Rangbah ka Jylla. “Ngi la ai jingmut ïa ka Sorkar ba kan pynbeit thymmai ïa ka Meghalaya School Education Services Rule hadien bad hadien bala pynjlan ïa ka rta rungkam jong ki nonghikai skul SSA ban ïoh hikai ha ki skul Sorkar naduh Lower Primary haduh Higher Secondary na ka 37 snem sha ka 45 snem ngi la ai jingmut ban mang kyrpang ha kaba ïadei bad ki kam ba lait (Post) haduh 70% ïa ki nonghikai SSA kiba dang don haka kam” la ong u Bah Aristotle.

U Bah Aristotle u la pyntip ba ka MSSASA ka la ai jingmut iaka Sorkar ban buh ha ka bynta kaba nyngkong ïa kiba la biang ka kyrdan pule katkum ki kyndon ka NCTE ba la pynmih ha ka 23 tarik, Nailar 2010. Ngi la ai jingmut ïa ki nonghikai SSA kiba rungkam ha lane shwa ka 23 tarik, Nailar, 2010 bad ïa kiba rungkam ha lane shwa ka 29 tarik, Naitung, 2011 kiba la biang ka kyrdan pule bad ki bym donkam ban pyndep ïa ka Meghalaya Teachers Eligibility Test (MTET). Ïa ki nonghikai SSA kiba dang pyndep ïa ka kyrdan pule bad ka D.El.Ed., B.Ed., bad MTET ki bym pat pyndep ïa ka MTET. Ïa ki nonghikai SSA ki bym pat pyndep ïa ka D.El.Ed., B.Ed., bad MTET.”“Ngi la ai jingmut ïa ka Sorkar ban pyllait noh ïa ki nonghikai skul SSA kiba rungkam ha lane shwa 23 tarik Nailar, 2010 bad ha lane shwa ka 29 tarik, Naitung, 2011 na ka eksamin MTET. Lada ngi peit ïa ki kyndon jong ka NCTE ba la pynmih ha ka 23 tarik Nailar, 2010 ka para 4 bad 5 ka thoh shai ba kino kino ki nonghikai kiba rungkam shwa ban pynmih ïa ka Jingpynbna kim donkam ban pas ïa ka Teachers Eligibility Test (TET) hynrei kin hap ban bud ïa ka jingpynbna kaba pynmih da ka NCTE ha ka 3 tarik Nailur, 2001,” la ong shuh shuh u Bah Rymbai.

U la ong ruh ba ka Seng ka la dawa ïa ka Sorkar ban pynlong la ka jong ka eksamin MTET ba kyrpang tang na ka bynta ki nonghikai skul SSA kiba la shakri ha ka kam la jan palat 20 snem khlem da pynïakhleh lang bad kiba dang thymmai.“Nalor ka MTET, ngi la ai jingmut ïa ka Sorkar ban pdiang ïa ka CTET ïa kiba dang donkam ban pas ïa ka eksamin MTET. Ïa ki nonghikai SSA kiba la jan shongthait ka Sorkar ka dei ban wanrah ïa ka song jingïarap kaba kyrpang,” la ïathuh u nongïalam ka MSSASA.