Ai jingmut ka Planning Board ban tei Flyover ban pynduna jingdheng kali ha sor Shillong

U MLA ka UDP na Mawsynram constituency uba dei ruh u dkhot ka Meghalaya State Planning Board (MSPB) u Bah Olan Sing Suin ula pyntip ba ka Board ka la trei ia la ka kam bad shimkhia ia ka jingdheng kali hapoh ka nongbah Shillong. Haba kren shaki lad pathai khubor u Bah Suin ula ong ba ka MSPB ka la dep ai jingai jingmut sha ka Sorkar jylla, ba kynthup ia ka jingtyrwa ban tei ia ki Flyover, kum kawei na Polo sha Anjalee, ban pynduna ia ka jingdheng kali.

“Ha ka por jong ka jingialam u Bah Metbah Lyngdoh kum u Chairman ka MSPCB ngi lah leit ban jurip ia ki jaka kiba mad jingeh bha na ka jingdheng kali kaba jur. Ngi lah dep ban aiti ia ki jingai jingmut sha ka sorkar jylla” la ong u Bah Suin. Ka MSPB ka dang iatreilang bad kiwei pat ki tnat Sorkar kynthup ia ki pulit bad ka tnat pynroi sor ban pynmih ia ka buit treikam ban pynduna ia ka jingkhapngiah hapoh ka nongbah Shillong. U Bah Suin u la pynpaw, ia ka jingkyrmen ba da ka jingmih jongka New Shillong Township bad ka jingpynkynriah ia ka Secretariat kan iarap shibun ha kaban pynduna ia ka jingkhapngiah hapoh ka nongbah bad kaban lam sha ka jingiaid beit jong ki kali.

“Yn sa tei ia ki katto katne ki ‘Flyovers’ ha Shillong kum ha Polo, Anjalee ban pynduna ia ka jingdheng kali. Ngi khmih lytni da ka jingmih jong ka New Shillong Township bad jingpynkynriah ia ka Secretariat shatei, kan don ka jingpynduna ia ka jingkhapngiah bad ban sakhi ia ka jingiaid beit jong ki kali ha ki por kiban wan” la bynrap u Bah Suin.