Ai jingthoh u MP sha u Myntri sorkar pdeng ban thung Director ha NIFT Shillong

U MP ka Shillong u Dr. Ricky AJ Syngkon hynne ka sngi ula leit ban ujor sha u Myntri ka tnad Textiles ka sorkar India u Giriraj Singh Ji ban tuklar halor ka jingbym don u Director ba pura ha ka National Institute of Fashion technology, Shillong.

Ha ka dorkhas u MP ka Shillong ula ong ba ka jingbym don ia u Director ba pura, ka la ktah ia ka rukom treikam ha katei ka Institute.

“Ka NIFT Shillong mynta ka treikam khlem u Director ba pura. Ka jingbym don ia u nongialam ba tikna ha kane ka Institute ka la ktah ia ka rukom pyniaid bad kumjuh ia ka jingpule,” ula ong.

Nalor kane, u Dr. Ricky ha ka dorkhas ula ong ba kane ka Institute ka don ka jingduna nongtrei na ka daw ba kam lah ban thung ia ki nongtrei ba pura ha ki snem ba la dep.

“Kane ka jingduna nongtrei ka la ban khia ia kiwei pat ki nongtrei bad ka pynlong ruh ban sahteng ki kam,”la bynrap u Dr. Ricky.

Ula ong ba ki don bun ki kam hikai kiba dang sah thylli bad ka la pyllong ia ka Institute ban shaniah ha ki nonghikai ba shu shim kontrak ne kiba wan tang shipor. Kane kan ktah ia ka rukom ai jinghikai, ka jingiadei hapdeng u nonghikai bad u khynnah pule, ka jingbteng ki prokram pule, bad ka ktah ruh ia ka jinglong jingman hapoh ka Institute.

Ula bynrap kine baroh kynthup ka jingbym don u Director ba pura, ka jingduna nongtrei ophis, bad ka jingthylli ki kam hikai, ka kdew ba ka tlot ka rukom treikam bad kan ktah ruh ia ka rukom pyniaid bad ka rukom ai jinghikai ha NIFT Shillong.

Ula kyntu ia ka tnad ban shimkhia ia kane ka kam bad ban shim ia ki sienjam kiba biang, kynthup ka jingthung ia u Director ba pura ha NIFT Shillong bad ban pyndap noh kloi ia ki kam ba sah thylli.