Ai por ka MSSASA shibnai ia ka sorkar ban ai ki jingdawa

Ki nonghikai SSA hapoh ka lama jong ka Meghalaya SSA School Association (MSSASA) mynta ka sngi ki la rai ban ai por ia ka sorkar hapoh u bnai Risaw,2025 ban pynurlong ia ki mat jingdawa jong ki nonghikai SSA kynthup ban wanrah ia ka polisi na bynta ka Job Security ne ban pynskhem ia ki kum ki nonghikai SSA bad ban pyntreikam ia ka Pay structure na bynta ki nonghikai SSA.  Kane ka jingaipor jong ki ia ka sorkar, ka long hadien ba ka tnad pule puthi ka jylla, ka la kular sha ki nonghikai ba hapoh u bnai Risaw kan sa rai ia ki jingdawa jong ki.

Ha ka jingialang bah jong ki nonghikai SSA ba long hynne ka sngi ha madan Malki, ki nonghikai ki la shim ia kawei ka rai ba lada ka sorkar hapoh une u bnai Risaw, kam lah ban pynurlong ia ki mat jingdawa jong ki, kin sa mih madan ban pynlong da ka jingiakhih kaba kham pher na ki jingiakhih kaba ki la ju iakhih baroh shi katta.

“Lada kim pynurlong ia ki jingdawa jong ngi hapoh une u bnai risaw, ngin sa shu pynbna beit da ka jinngiakhih kaba kham long pher, ym shuh da kaba shah thngan, thiah meit ne kino kino ki jingiakhih kaba ngi la ju pyllong mynshwa,” ong u President ka MSSASA u bah Aristotle Rymbai. Ha shwa ban pynbna ia kane ka rai iakhih, ki nongialam ka MSSASA ki la rai ba ha une u bnai Risaw kin sa leit ban iakynduh ia u Myntri Rangbah ka jylla u Conrad K Sangma  bad ia u Symbud Myntri Rangbah ka jylla u bah Prestone, ban pynsngew ia ka jingdawa jong ki.