Ai ram ka sorkar T.1,100 klur ia ki SHG, kylla lak lakpatis 41 hajar ngut

U Myntri Rangbah ka jylla ula iathuh ba mynta ki don haduh 53,000 tylli ki kynhun Self Help Group ha ka jylla bad ka jingdon ki dkhot ka la kiew sha ka 5,80,000 ngut.

U Conrad ula iathuh ba ka jingairam ka la kot kumba T.1,100 klur ha kaba 95 percent na kine ki kynhun ki la siew biang ia ka ram sha ki bank ha ka por ba biang.

Ula iathuh ba ha u snem 2018-19, ki don don tang kumba 4,000 haduh 5,000 tylli ki SHG bad ka jingdon ki dkhot ki long tang 40,000 ngut ki kynthei. Hynrei mynta, ha kine ki phra snem, la lah ban pynkiew sha ki 53,000 tylli ki SHG bad ka jingdon ki dkhot ka long 5.80 lak ngut.

“Ka jingdon jong ki dkhot ha ka SHG ruh ka la kiew na ka 40,000 sha ka 5.80 lak ki kynthei kiba ioh jingmyntoi,” la iathuh u Conrad haba iarap jubab ia ka jingkylli ba la wanrah da u MLA ka Mawryngkneng u bah Heavingstone Kharpran hynne ka sngi ha Iing Dorbar.

Ula iathuh ba hadien ba wan ka projek jong ka National Rural Livelihood Mission (NRLM), na ki 5. 80 lak ngut ki dkhot SHG ha ka jylla mynta ki don kumba 41323 ki ba la dei ki lakpatis ha kaba ki lah ban kamai kumba 1 lak shi snem.

Ula ong ba mynta ka sorkar ka dang ialeh ban iarap ban pynkylla ia ki ban long sha ki millionaire, kaba mut kumba 10 lak tyngka kin kamai.

“Namarkata, kam shym la don kano kano ka jingkhein kaba kdew ba kine ki kynhun kim shym la bud ia ki riti synshar ne ki kyndon jong ka sorkar pdeng,” ong u myntri Rangbah.

Ula ong ban thaw ia ki SHG ka suk bha bad kim donkam ban registar hynrei ki donkam tang ban don 10-15 ngut ki longkmie ban thaw ia ka kynhun SHG.

U Myntri Rangbah ula iathuh ba ka sorkar ka btin lynti bad ka kyrshan ia kI SHG ban pyntikna ba kin nang kham lah shuh shuh ban trei.

Ha shwa kane na ka liang u Myntri ka tnad C&RD u bah Sostenes Sohtun ula iathuh ba ki don 7088 ki Self Help Group (SHG) ha East Khasi Hills kiba la kyrshan da ka National Rural Livelihood Mission (NRLM) bad kine ki treikam lut.

U Myntri ula iathuh ba tang ha Khatarshnong-Laitkhroh 602, Mawkynrew 401, Mawlai 344, Mawpat 312, Mawphlang 807, Mawryngkneng 594, Mawsynram 931, Mylliem 650, Pynursla 948, Shella Bholaganj 616 bad Sohiong 833.