Ai u Conrad T.1 Klur sha ka Nazareth Hospital ban kyntiew ia ka rukom ai jingsumar

Daka jingbteng ia ka polisi treikam jong ka sorkar jylla ban ai jingkyrshan da ka pisa ia ki hospital kiba pyniaid da ki riewshimet khnang ba kin lah ban kyntiew ia ka rukom ai jingsumar ia ki paidbah khamtam ia u duk u suk, hynne ka sngi u Myntri Rangbah ka Jylla Conrad K Sangma, ula aiti ia ka T.1. Klur sha ka Nazareth Hospital, Shillong. Kane ka jingai iaka pisa kaba T.1 kadei ha ka wat kaba nyngkong bad ha ka wat ka baar yn sa aiti sa T.1. Klur sha ka Nazareth Hospital. Haba kren ha ka jingialang u Conrad K Sangma, ula ong b aka sorkar jylla ka iengskhem bad ka pynleit jingmut ha ka liang ka koit ka khiah wat hapdeng ka jingiakynduh ia ki jingeh kiba bun ha kane ka bynta.“Ka jylla Meghalaya kadei kaba la bhah tyngka kaba heh tam ha ka liang ka koit ka khiah haba ianujor bad kiwei pat ki jylla hapoh ka ri, ia kaba ka pisa kaba bun tam kadei kaba la pyndonkam n aka bynta ban pynbha ia ki jingtei ki bapher bapher” ula ong.

 “Ka thong jong ngi hi kadei kajuh, ban ai ia ka jingsumar kaba bha, kaba thikna bad kaba lah ban kot bor da ki paidbah bad kadei kane kaba ngi lah ban iatreilang bad ki hospital ki bapher” ula ong bad ka pyntip ha ka jingialang shaphang jong ka jingpynwandur ia ka Meghalaya Health Advancement Policy. Ula pynpaw ia ka jingsngewnguh ia ki briew kiba ai jingshakri ha ka liang ka koit ka khiah bad ula kyntu iaki, ba kin bteng ban ai ka jingshakri da ka jingkmen, ka jingaiti bad ka jingsngewrit.Ka Administrator jong ka Nazareth Hospital, Shillong, ka Sr Noreen, kala pynpaw ia ka jingsngewnguh ia ka sorkar jylla halor kane ka jingai jingkyrshan da ka pisa kaba long kaba donkam bha ia ka hospital bad kala pynpaw ruh ki bynta kaba ka hospital ka donkam i aka jingiarap pisa na ka bynta ban thied ia ki kor ki bor ban iada iaka jingim jong ki briew bad ki Ventilator na ka bynta ka Emergency Trauma Unit, Maternity Care bad ka Neonatal Intensive Care Unit bad yn pyndonkam ruh da ka College of Nursing kaban sa wan, kaban pdiang haduh 100 ngut ki samla pule ha ka shisnem.

Ha kane ka jingaiti ia katei ka pisa da ka Cheque la iadonlang u Commissioner & Secretary u Dr Joram Beda, u National Health Mission, Mission Director, Ramakrishna Chitturi, Auxiliary Bishop ka Shillong u Fr Bernard Laloo bad Vicar General u Fr Richard M Majaw.