Aiti ka JHADC sha ka Selection Committee ban peit bniah

Mynta ka sngi haka dorbar mang tyngka ka JHADC, ka Executive Committee lyngba u CEM u Thombor Shiwat kala tyrwa ban pynkylla iaka aiñ Elaka, Dolloi/Sirdar bad waheh shnong da kaba tip kum ka The Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) (Amendment) Bill, 2026.

Ki bynta pynkylla ha kane ka  Bill

kynthup ia ka Section 4 Sub-Section (2) bad (3) ba kin long kum ki Sub Section (3) bad (4) da kaba pynrung thymmai iaki kyndon Sub Section (2) kaba ong ba iaka jinglut haba pynlong Election Dolloi dei ban pynlut mar katjuh hapdeng ka District Council bad ka Dorbar Elaka (The cost of election shall be equally borne by the Dorbar Elaka and the District Council).

 Ha ka Section 13 ba lada thylli ka shuki u Dolloi/Sirdar ka Executive Committee jong ka Council ka lah ban thung iaki sahep ban peit iaki kam shynshar hapoh ka Elaka kumba ar bnai hynrei ia kane la tyrwa ban pynduh pyndam noh. Ka jingpynkylla ba lai pat  haka Sub-section (1) ka Section ba 23 kaba iadei halor ka rukom jied Waheh shnong, ba ka dei ban long kumba la juh  pynmlien da kato ka shnong “in accordance with the existing custom and tradition prevailing in that village”. Sa kawei pat ka jingpynkylla dei halor ka  jingaibor iaki Dorbar shnong ba kin shim ia ka rai haka jingiadei bad ki bai kot bai sla katkum ka jingibit jong ki.

Haka kynta iatai ia kane ka bill bala shim bynta ban pyrshah jur bad pyni ñia daki nongialam ka liang pyrshah  u Awhai Andrew Shullai, u M.B.Rymbai, u Rikut Pareiñ, u Jamshaphrang Pohtam kiba la ong ba kane ka bill ka dang don shibun ki jingduna da kaba kdew ruh iaki bynta bapher bapher ha kane ka bill kiba lah ban wanrah jingma iaki Elaka ki dorbar shnong, naka liang u MDC liang shynshar ruh u Reformingson Lamare ula ieng ban ai jingkubur iaka jingduna kane ka bill.  Kumta naka liang ka ïing dorbar da ka jingiasngewthuh jingmut hapdeng ki MDC ka liang shynshar bad liang pyrshah kila rai ban thaw daka Selection Committee ba kan peit bniah bishar bniah biang khnang ba kan ym wanrah kano kano ka jingma.

Iaki dkhot ka selection committee ruh la jied hapoh kane hi ka dorbar ha kaba ki dkhot la kynthup lang naduh kiba don haka liang pyrshah bad liang shynshar.Iaka kam chairman ha kane ka Committee la jied ia u CEM JHADC u Thombor Shiwat, Secretary  dei  daka Secretary EC hi, ki dkhot kynthup u Lasky Rymbai Dy CEM, u Moonlight Pariat EM, u Medling M Swer EM. Naka liang pyrshah pat la jied ia u Awhai Andrew Shullai nongialam liang pyrshah, u M.B.Rymbai bad u Jamshaphrang Pohtam. Katba naka bynta ki expert member pat la rai ban thung hadien.