Ka la long shisha ka jingkmen bad ka jingkyrkhu kaba khraw ia kawei ka longiing hadien ba u Bah Damanbait Lamare, MLA ka Umroi Constituency u la lah ban pynshna bad ban aiti syndon da ka iingsah kaba paka sha kane ka longiing kiba sah ha ka shnong Kalapangti.Kane ka longiing kaba la iohpdiang syndon da ka iingsah kaba paka, ka dei jong u Bah E. Mukhim bad ka Kong N Lyngdoh kiba don ruh shiphew ngut ki khun kiba la shongsah jynjar mynta la bun bun snem, ymtang tang ka iingsah kaba paka, hynrei la pyndep ruh ia ka jingtan bording ilektrik bad ruh ka jaka leit shabar kaba paka.
Nalor u MLA Bah Damanbait Lamare, la sakhilang ruh ha kane ka sngi kaba kmen da u Rangbah Shnong ka Kalapangti u Bah T. Rynjah, u In-charge ka Khapmara PIC u Bah S. Pakyntein, u President ka NPP Raid Madan Kyrdem u Bah Pynskhemlang Sun nalor kiwei kiwei. Na ka liang u Bah Damanbait Lamare, u la pynpaw ia ka jingkmen ban lah ban pyndep ia kane ka iingsah bad ban aiti sha kane ka longiing kaba la mad jingeh la bun bun snem, ha kaba u la bynrap ruh ba kum u nongmihkhmat paidbah u hap ruh ban peit lem ia u duk u suk kiba mad jingeh ha ka Jingim jong ki, nalor ka jingkitkhlieh na bynta ka roi ka par jong ki Shnong hapoh ka Constituency.
U la iathuh ruh, ba kine baroh ki dei ki matti bad ki jinghikai ba u ioh na la iing kata naduh u Ma Ngaitlang Dhar bad u Ma Sniawbhalang Dhar kiba ju hikai ban peit ia ki jingeh jong kito ki longiing kiba shem jingeh jynjar ha ka jingim kaba man ka sngi, da kaba kitbok kitrwiang ruh ia kane ka longiing ba kin nang roi na kawei ka por sha kawei pat.