Ka Executive Committee jong ka Jaiñtia Hills Autonomous District Council haka kynta kylli jingkylli jongka dorbar mang bala sdang hynne ka sngi, lyngba u EM ka tnat Arts and Culture u Lasky Rymbai ula pynpaw ba ka district council ka don ka jingangnud ban ithuh daka aiñ jong ka council iaki riti dustur ba don hapoh Rilum Jaiñtia la haba iadei bad ki jingshad ne kino kino ki jinghikai u longshwa manshwa, bad ong ruh ba u tip ka shad Rongkhli ne Rongkhla ba juh leh ha shnong Nongtalang ruh dei kawei naka shad ba donkam ban ithuh.
Tangba naka daw ba ki Dolloi kiba la bynshet ban phah jingthoh shapoh ka council haba iadei bad ki riti dustur bapher bapher ba don hapoh ki Elaka jong ki kim pat pyndep haduh mynta.
Ia kane ula jubab dei lyngba ka jingkylli bala wanrah da u Jamshaphrang Pohtam MDC VPP naka War Central.
Haba iadei pat bad ka iew Jaraiñ kaba tip kum ka Jaraiñ Private Market kaba la khang naduh u bnai Sept 2023 naka daw ba mih jingiakhajia hapdeng ka shnong Jaraiñ bad ka Amwi Ar Lyngdoh, u Jamshaphrang ula kylli kiei ki sienjam baka council kala leh.
U Seiborlang Shadap EM incharge u iathuh ba ka council bunsien ka juh leit jurip bad pyrshang ban iakren pyniasngewthuh jingmut hapdeng 4 tylli ki shnong ba hap hapoh kane ka iew hynrei kim pat poi shaka jingiasngewthuh.
Haba u kylli pat lada jia ba kim poi shuh shaka jingiasngewthuh jingmut, bad ka shnong Jaraiñ ka kwah ban sdang daka iew lajong ha kane ka shnong don mo ka lad ka lynti ba ka council kan plie lad, u Seiborlang Shadap u ong naka liang council kan sa pyrshang ban peit bniah shwa iaki kyndon ki aiñ.
Ha kajuh ka por u Jamshaphrang ula buh jingkylli ruh la ka district council ka don jingthmu ne em ban iarap kyrpang iaka Raid Nongtalang kaba iakynduh jingeh ban pynlong iaka shad Rongkhli ne Rongkhla katkum ba dei ka niam ka rukom namar ka jingiatyngkhuh bad ki ain ba iadei bad ka wildlife (protection) Act 1972.
U EM in-charge ula kubur ia ka jingeh ban pynneh pynsah iakine ki jingshad khamtam haba ki don ki jingiatyngkhuh bad ka aiñ, kumta u la ai jingmut ba kan bha iaka Raid Nongtalang ban ai jingthoh sha ka district council khnang ba ka department jong u kan ioh peit bniah bad leh ia kaba donkam.