Ar bnai Korphiw Miet ha khappud Bangladesh

Ka Deputy Commissioner jong ka East Khasi Hills ka Kong RM Kurbah hynne ka sngi ka la pynjari ia ka korphiw miet ne Night Curfew ba 2 bnai kynthip ha jaka khappud ba don hapoh ka 1 km na u Zero Line bad ka Ri Bangladesh.  Katkum ka hukum kaba la pynmih da ka DC, kala pynpaw ba kane ka korphiw kan sdang naduh ka por 8 baje mynmiet haduh ka por 6 baje mynstep bad kane kan treikam man la ka sngi haduh 2 bnai.  “Namar ka jingiohi ia ka jingiohi ia ka jinglong jingman ha ka ri Bangladesh, ka lah ban don ka jingwan rungtuh jong ki riewsniew, ki dkhot jong ki kynhun kieng atiar, ki nongkhaii tuh ne kino kino ki kam sniew ha ki thain khappud. Lada ia kum kitei ki kam sniew ym lah ban tehlakam kan lam sha ka jingjia kaba yn ym lah ban tehlakam shuh ia ka jingwan rungtuh ha ki thain khappud bad kan pynmih ia ka jingpynthud ia ka shongsuk shongshngain ha ka district, ka jylla bad ha ka ri hi baroh kawei, la pynpaw ka DC ha ka hukum.  

Kane ka hukum kala mana tyngeh ruh ia ki paidbah ba kin iaid ha ki thain khappud ne ban don ia ka jingthmu ban jam sha shilliang u pud bad ka ri Bangladesh ne ban wan rung sha u pud u sam jong ka ri India. Nalor kane, kala maham ruh ban iaid paidbah ne ialum paidbah kaba palat ia ka 5 ngut bad ban rah ia ki tiar kiba lah ban pynmynsaw kum ki dieng, nar-rod bad ki maw ha kylleng ki thain khappud bad ka ri India bad Bangladesh. Ki kam be-ain, ki kam sniew, ki kam ki bym iahap ban leh, kaba kynthup ia ka jingkhaii tuh ia ki masi, ki mar kiba be-ain, kwai, tympew, ktung, biri, sikret, slasha bad kiwei kiwei.

Ki thain khappud kiba hap ha East Khasi Hills kidei ki jaka ki bym pat ker sainar bad kiba don ha ka jingma ban wan rung tuh da ki mynder ri, ki dkhot jong ki kynhun kiba leh ia ki kam sneiw kiba don jingiadei bad ki kynhun ban ialeh pyrshah ia ka ri kaba kynthup ruh ia ki kynhun kieng atiar kiba lah ban ialum bun ngut hajan ki thain khappud ha ka por mynmiet ban sdang ia ki kam sneiw ki jongki.