Ba bun ki permit ia ki dukan ba shna ha Iawmusiang Complex, khot iamir jingmut u MLA Jowai

U Myntri ba thymmai ka sorkar jylla uba dei u MLA ka 2-Jowai, u Wailadmiki Shylla mynta ka sngi ula leit jurip biang ia ka Iawmusiang Complex ha Jowai, kaba la sahteng la bun phew snem ha kaba ka jingtrei mynta ka la iaid kumba 70% naduh ba la sdang ka jingpyntrei. Ka jingleit jurip jong u mynta ka sngi hadien ba u ioh jingtip ba ki dukan ba shna ha kane ka complex ki duna na ki permit ba la ai sha ki paidbah. Ha kane ka  jingleit jurip u Wailadmiki Shylla ula khot lang ia u EM ka JHADC ba dei peit ia ka tnat Market, u Seiborlang Shadap lem bad ki nongialam ka Jaiñtia Tribal Traders Association (JTTA) ki ophisar ka tnat PWD lem, ki nongshong iew ha kaba ki la iashong iamir jingmut ruh ha kane ka sngi.

Hadien ka jingiamir jingmut haba kren sha ki lad pathai khubor u Wailadmiki Shylla u ong hadien ba ka jingtrei ka la iaid shakhmat la kumba 70% u ioh jingtip ba ha ka por ba pynkynriah ia ki nongshong iew sha Iawthymme don palat 600 tylli ki dukan hynrei ki dukan ba shna pat ha kane ka complex don tang kumba 320 tam ei ei, kumta ula khot ban iakynduh lang ha kane ka sngi. U ong ruh hadien ba u shimti kum u MLA u don ka jingangnud ban pyndep ia ki skhim ba sahteng bad shwa ban shimti kum u MLA la kumno kumno 30% ka jingtrei ka la dep lypa namar ka JHADC kala ioh 6 klur tam naka first installment bad u dang mut ruh kala don lypa ka jingïapynbeit ha kini kino ki bynta naba sdang.

Kumta ma u ruh hadien ba shimti ula wad lad ban ioh iaka mang pisa ban sdang biang ka jingpyntrei bad hadien ba ioh pisa u ruh ula bud thik katkum ka plan naba sdang, bad tang  khyndiat ka jingpynkylla kata ha kawei ka tnum ba mut daka tin la shna noh daka slap da kaba pyrkhat iaka jingmyntoi ki nongshong iew. Kumta halor ka jingbun ki permit iaki dukan bala shna ula ai jingmut iaka seng  JTTA lem bad ka JHADC ba kin ia pynbeit da kaba u khmih lynti ruh kan sa don lehse ka lad hadien naka bynta ban pynheh shuh shuh iaka iew bad naka liang jong u ruh un iatreilang.