Ba shah khein be-ain ha ka MHAYn iakhun ka HNLC lyngba ka Tribunal pyrshah ia ka sorkar India

Ka seng Hynniewtrep National Liberation Council (HNLC) ka la rai ban iakhun katkum ka ain lyngba ka Tribunal halor ka jingkhein beain ka tnat Ministry of Home Affair (MHA) ka sorkar pdeng ha u snem 2024. Ïa kane la pyntip da u Ksiang ka HNLC u Bah Sadon Blah bad ula ïathuh ba ka HNLC ka la thung ïa u nongiasaid ain u Bah Fernado Shangpliang ban mih ia ka HNLC ha ka Tribunal ban long ha ka 22 tarik Lber ha Convention Centre, Shillong. Haba kren sha ki lad pathai khubor u Bah Sadon, ula ïathuh ha sien nyngkong ka HNLC kan iakhun da ka ain ha ka Tribunal ba khlieh da u Justice Soumitra Saikia ban weng na ka jingshah khein beain jong ka seng. U Bah Sadon ula iathuh ba naduh u snem 2002 ka Ministry of Home Affairs ka Sorkar Pdeng da ka jingai jingmut ka Sorkar Jylla, la niew seng beaiñ ia ka HNLC hynrei katkum ka jingpyntip (Notification) ba la dep pynmih ba la pynmih da ka Sorkar Pdeng, ha ka 13 tarik Naiweing 2024, ha ka Gazette Jong ka Ri, la kdew ia ki daw ba la pynngat seng beaiñ ia ka HNLC hapoh ka Section 3 (1) Jong ka Unlawful Activities (Prevention) Act, 1967, hynrei ha ka  Gazette Notification ba la pynmih ha ka 6 Tarik Nohprah 2024, la bthah ban thaw ia ka Tribunal  ban ai lad ia ka HNLC ban iasaid  halor ka jingshah khein kum ka seng beaiñ.

U la bynrap iathuh ka Tribunal kan pynlong ka Hearing ha ka 22 Tarik Lber 2025 ban ailad ia ka HNLC ba kan iakhun pyrshah ia ka jingshah khein beaiñ bad ban iakhun pyrshah ia kane ka rai jong ka MHA kaba la shah niew beaiñ naduh u snem 2002 haduh mynta 2025. “Ka HNLC ka la thung ia u Bah Fernado Shangpliang kum u nongiasaid taiñ ha kaba u heh jong ka Tribunal un dei u Justice Soumitra Saikia, na ka Sorkar Pdeng um mihkhmat da u Subhash Chandra Keyal bad na ka Sorkar Jylla yn mihkhmat u Bobby SW Momin , IPS , Superintendent of Police (SB-iI bad kiwei kiwei ki heh Pulit bad heh Sorkar” la ong u Bah Sadon. U Bah Sadon ula ong, naduh ba ka HNLC ka la sdang ia ka jingiakren iasuk hapdeng jong ka bad ka Sorkar, ki la pyrshang ban iakren lyngba u nongmihkhmat ka Sorkar Pdeng, ban dawa ba ki dei ban weng noh ia ka jingshah khein beaiñ ia ka seng. “Wat la ar snem tam ka HNLC ka la iakhun ia kane lyngba ka jingiakren, hynrei na ka liang ka Sorkar Jylla bad ka Sorkar Pdeng ki la kren shai ba kim lah ban weng namar kata ka seng ka HNLC kam banse ban shim da ka lynti Jong ka ain” u la ong.

U Ksiang ka HNLC ula ong ruh ba ka jingshah khein beaiñ ka HNLC ka dei halor ki jingkynnoh ba ka don bynta ha bun ki kam pyntriem ha ka Jylla, ka jingdon jingiadei bad kiwei pat ki seng kieng atiar jong ka thaiñ shathei lammihngi (North East), halor ka jingdon bynta ha ki 48 tylli ki criminal cases, kaba kynthup ban pynbthei bom ha kiba bun jaka naduh u snem 2009 haduh 2024.