Ba ujor u K.L. Pariat sha NGT hiar jurip ka Joint committee ïa ka wah Myntdu

Ka joint committee bala thaw kyrpang lyngba ka hukum ka NGT naka suo moto cases bala ujor da u Khroo Lamsalanki Pariat katkum ka principal bench No 1271/2024 order dated 04/02/2026, ha kaba u nongujor ula ong ba ka wah Myntdu kala shah ktah naka jingpyntrei ia u Surok thymmai Jowai Bye Pass uba na Treïongriang sha Khliehtyrshi, kumta mynta ka sngi kane ka joint committee kala hiar ban leit jurip ia une u surok kumjuh ruh iaka wah Myntdu ha ryngkat ka jingdonlang u nongujor Khroo Lamsalanki Pariat lem kiba mihkhmat naka liang ki nongpyntrei ia une u surok.

Ki dkhot jong kane ka committee kynthup u SC Sadhu IAS, Secretary, forest and environment department, u Er.Abhay Kumar, CWES, general manager Brahmaputra Board, u C.E Wahlang Superintending Engineer (WR) HPD, Water Resource department, ka kong Amabilis Phawa Superintending Engineer PWD (Roads) Jowai Circle, u Sandrew Syiem Senior Environmental Engineer MSPCB, u Manhubeitki Passah Executive Engineer Jowai municipal board bad u Dr.G.H Chyrmang, MFS, Member Secretary Meghalaya Polution Control Board meghalaya Shillong, ia uba la thung ruh kum u nodal officer kane ka joint committee.

Ka jingjurip kala sdang na Khliehtyrshi ter ter u Surok Jowai bye pass shaduh Treïongriang, kila jurip ruh iaka wah Myntdu, iaka jaka bret khyndew naka jingpyntrei ia une u surok kaba don ha Demthring, bad khatduh kila leit sha Urkhla ban jurip iaka dam Mupiah kaba dei ka bynta ka wah Myntdu ba tan umbam umdih ka tnat PHE shaki paidbah ka sor Jowai.

Haba iakren bad u Dr.G.H Chyrmang, MFS, Member Secretary Meghalaya Polution Control Board meghalaya Shillong, & nodal officer, u ong ia kane ka joint inspection la pynlong katkum ka hukum ka NGT namar ba haka 11 tarik u bnai March kan don ka jingshong bishar halor kane ka cases bala ujor da u Khroo Lamsalanki Pariat.

U iathuh ba ka kamram jong kane ka committee ka long ban peit kiei ki kam bala dep leh ba u contractor ula dep pynkhuid bad kiei ban sa leh shakhmat.

Bad kumba iaka meghalaya polution control board la thung ruh kum ka Nodel department naka bynta ban peit halor kane, u ong ba kin sa phah iaka report shwa ban poi ka tarik shongbishar ( hearing), ha kaba kino kino ki kam ba dei ban leh ym sa ai jingmut ka committee.