Bam smai u Octomewot Lamin kum u Nominated MDC ha JHADC

U Octomewot Lamin uba juh long kum u MDC shu sieh ne nominated ha ka samoi treikam barim ka JHADC kata naduh u snem 2019, mynta ka kynti hadien ba la pynthymmai ia ka samoi treikam ka JHADC la jied bad thung biang ia u ban long kum u nominated MDC.

Halor ka jingshah jied bad thung biang kum u nominated MDC, mynta ka sngi u Octomewot Lamin ula leit bam smai ha kamra treikam u Chairman ka JHADC u Dr. Sankey Shangpung ha ryngkat ka jingdonlang u CEM ka JHADC u Thombor, u nongialam ka liang pyrshah u Awhai Andrew Shullai lem bad kiwei pat ki pra MDC.

Haba ai jingkren u O. Lamin u pynpaw ka jingsngewnguh ia baroh ki MDC naduh u nongialam ka liang pyrshah halor ka jingiatreilang baroh shi kato na ka bynta ka jingbha ka council, wat lada ka council ka mad ia ka jinghiran pisa nalor kiwei pat ki jingeh.

U kyrmen ba ka jingiatreilang kan dang bteng shuh shuh nangne shakhmat halor kumno ban pyntynlun iaki kam ka council, ba naka liang jong u ruh un ai ka jingiatreilang.

U CEM Thombor Shiwat haba kren u ong mynta dei ka sngi bala pyndap iaka jingduna ka jingdon ki MDC namar ngi sngewthuh ba katkum ka jingbuh beit ryntih ki kyndon ka aiñ ka JHADC ka dei ban ioh uwei u nominated MDC nalor ki 29 ngut kiba la jied da u paidbah, khnang ban biang ka jingdon ki MDC 30 ngut.

U CEM u ong, lada kheiñ na baroh ki nominated MDC shadien u O.Lamin dei uba ioh iaka por ba jrong tam ha kane ka council bad mynta sa ha kane ka samoi ruh ula shah jied biang ba un iatreilang iaki kam ka council.

U ong ba haki snem ba shadien la iohi ba u O Lamin dei uba iatreilang ha kiba bun ki bynta ka council da kaba don iaka mynsiem jingkitkhlieh, kumta u kyrmen ba ha kane ka kynti ruh kin ioh biang kajuh ka jingiatreilang.