Ban iada ki jaka ha khappud, yn thaw da ka Territorial Army

Ka Sorkar Jylla ka la pynkhreh ban pynkha da ka Territorial Army ban iada ia ki thain khappud jong ka Jylla Meghalaya. Ia kane la pyntip da u Nongaiktien ka Sorkar MDA u Bah Paul Lyngdoh bad ula ong, ïa kane ka jingtyrwa la phah da ka North East Student Organisation (NESO) bad ka Khasi Student Union (KSU). Haba kren sha ki lad pathai khubor u Bah Paul ula ong, naduh ki por ba u dang bat kum u President ka KSU u la phah ïa kane kajuh ka jingtyrwa sha ka Sorkar Jylla ban thaw noh da ka Territorial Army ban iada ia ki thaiñ khappud ka Jylla.

U Bah Paul ula ong, nalor ka Jylla Mizoram, ka Jylla Assam ruh ka la don ia ka Territorial Army ban iada ia la ki thaiñ khappud.“Haba ia dei bad kane ka jingdawa, mynta ka sngi ka Sorkar ka la ioh pdiang ka jingtyrwa kumno ban thaw lane pynkha ia ka Territorial Army hapoh ka Jylla” ula bynrap.Ula ong ka Sorkar Jylla ka hap ban shong pyrkhat sani halor ka jingthmu ban thaw ia ka Territorial Army namar kane ka mat ka iatyngkhuh bad ka Sorkar Pdeng.

“Ka kynhun Myntri Sorkar Jylla kan shong jingïalang ha ka 26 tarik Nailar ban iathir sani halor kane bad hadien ba la ioh jingmynjur na ka kynhun Myntri yn sa pynshai kham bniah, kumno ban iaid shakhmat halor kane ka jingtyrwa” ula ong. Halor ka jingkylli, u Myntri ula ong, “Hapoh Assam ia ka Territorial Army la pynhap hapoh ka jingpeit ka tnat kam pohiing hynrei ia ka Territorial Army hapoh Meghalaya kan Sorkar kan sa bishar bniah la yn pynhap hapoh ka tnat kam pohiing lane hapoh ka tnat Home Guard and Civil Defence.