Ban pynduh jait jingpang TB, ïasoi MoU ka Raj Bhavan bad NEEPCO

Kum shibynta ban pynkhlain ia ka jingkut jingmut ban rat dyngkhong ia ka jingpang Tuberculosis (TB) ha Meghalaya, hynne ka sngi ka Raj Bhavan, Shillong bad ka North Eastern Electric Power Corporation Limited (NEEPCO) ka la ïasoi ia ka Memorandum of Understanding (MoU). Ïa kane ka MoU la iasoi hapoh ka Pradhan Mantri TB Mukt Bharat Abhiyaan, Ia kane ka soskular la iasoi ha Raj Bhavan ha ka jingiadonlang u Lat ka Jylla CH Vijayashankar, u Major General RK Jha (AVSM) (Retd) Director (Personnel) ka NEEPCO, ki Heh Ophisar ka NEEPCO bad ki Nongmihkhmat na ka tnad ka Koit ka Khiah ka Sorkar Meghalaya.

U Lat ka Jylla u CH Vijayashankar u la ai ka jingiaroh ia ka NEEPCO halor ki jingshimkhia jong ka bad ban jur ia ka jingdonkam ban weng ia ki daw tynrai jong ka jingpang TB. Kum shi bynta jong Corporate Social Responsibility (CSR), ka NEEPCO kan ai jingkyrshan ha ka liang ka jingbam tei met sha ki 250 ngut ki nongpang TB lyngba ki jingbam ba man la u bnai kiba don ki jhur,kew, ki shana, pylleng bad ka dud.

U TB Officer ka Jylla Dr. M. Syiemlieh u la pynpaw ba ka Jylla Meghalaya mynta ka don haduh 3,108 ngut ki nongpang TB kiba dang shitom bad u la kyrpad ban ban nang mih ki Nikshay Mitras (nongnoh synñiang) ban ïadon bynta lang ha kane ka jingïakhun. Ka jingïadon bynta shimet jong u Lat, kynthup ïa ka jingkyrshan beit beit ïa ki longïing kiba shah ktah ha ka jingpang TB, ka la long ka lad ai mynsiem.