Ban pynitynnad ia ka thain Polo Iakren ka Sorkar bad ki trai dukan ba don hakhmat ka Shopping Mall

Hadien ka jingplie paidbah ia ka Shopping Mall ba heh tam hapoh ka Jylla, ka Polo Market, mynta ka kynti ka Sorkar ka dang pynkhreh ban pynitynnad shuh shuh ia ka thain Polo. Lah ban kdew ba ia ka Shopping Mall Polo Market la wan plie paidbah da ka Myntri ka tnat pla tyngka (Finance) Sorkar Pdeng ka Nirmala Sitharaman ha ka 11 tarik mynta u bnai. Wat la ka thain Polo mynta ka kynti ka la don 2 tylli ki iew kiba dei da ki jingtei pali dulan (Building) hynrei haba ia dei ha ki thain Polo, dang iohi hi ka jingdon ki maw jynthut kiba pynpulom noh ia ka thain ban long kaba itynnad.

Ha sawdong jong ki jingtei (Building) kiba heh haduh mynta ki dang don ki iing dieng kiba dei ki dukan kiba la rim, ki nala um ba jaboh. Haba ia dei bad kane na ka liang ka Sorkar ka dang pynkhreh ban iakren bad ki trai jong ki dukan kiba don ha sawdong jong ka Polo Market. Na ka liang u Myntri Rangbah ka Jylla u Conrad K Sangma ula ong ba ka Sorkar ka la don ia ka thong (Plan) ban nang pynitynnad shuh shuh ia ka thain Polo.

“Ka Sorkar kan pynitynnad shuh shuh ia baroh sawdong jong Shopping Mall Polo Market. Ngi la sdang ka jingiakren bad ki dukan kiba don ha sawdong jong ki 2 tylli ki Building bad hadien ba la biang lut ka jingiakren bad ki trai dukan, ka Sorkar kan leh ia ka ba donkam ban pynitynnad shuh shuh ia ka Polo baroh kawei” la ong u Conrad.