Ban pynkhlaiñ jingïadei ïa kynduh ki shipai BSF bad BGB

Ki shipai Border Security Force (BSF) ka ri India bad ki shipai Border Guard Bangladesh (BGB) ka ri Bangladesh, hynne ka sngi, kila iashimbynta ha ka jingialang kaba la pynlong ha ka thain khappud kaba don hapdeng kine ki artylli ki ri. Ka jingthmu jong kane ka jingïalang ka long ban pynkhlain ia ka jingiadei hapdeng kine ki artylli ki ri bad ban don ia ka jingiatreilang kaba paka bad kumjuh ban shimkhia ia ki mat kiba don ha ki thain khappud. Ia ka kynhun jong ka BSF la ïalam da u Manoj Kumar Barnwal uba long u DIG, Sector HQ BSF Shillong katba u Md. Saiful Islam Chowdhury uba long u Deputy Director General, Sector Commander BGB, Sylhet, Bangladesh ula ïalam ia ka kynhun jong ka BGB.

Ha katei ka jingïalang, kine ki heh shipai kila ïatai sani halor ki mat kiba ktah ia ki thain khappud kum ka Co-ordinated Border Management Plan bad kiwei kiwei ki mat bad kumjuh ban don ia ka jingiatreilang. Ki shipai BSF bad BGB kila pynpaw ia ka jingsngewhun halor ka jingpynlong ia kane ka jingïalang kaba seisoh bad kaba don jingmut kaba pyni ia ka jingdon ia ka jingiadei paralok hapdeng kine ki artylli ki ri. Ki heh shipai kila iengskhem ruh ha ka nongrim ban pynlong ia ka thain khappud kaba shongsuk shongshngaiñ bad kila iaroh ruh ia ka jingtrei shitom kaba iaid shakhmat hapdeng ki shipai BSF bad BGB ban pynneh ia ka shongsuk ha ki thain khappud.

Kane ka jingïalang kala shim ruh ia ka rai, ba kin iai bteng ban pynlong ia kum kine ki jait jingïalang ha ki sngi ban wan, ban pynthikna ba kan don ka rukom treikam kaba janai bad kaba ryntih ha ki thain khappud.