Ban pynmih bording kham bun T.407.36 klur yn pynlut ban pynbha ia ka Umiam Stage-II-III

U Myntri ka tnad Bording u Metbah Lyngdoh hynne ka sngi ula pyntip hapoh ka ïingdorbar thaw aiñ ba ka jingshna pynbha bad jingpyndait ia ki tiar katkum ka juk mynta (Renovation & Medernization) jong ka Umiam Stage-II Hydroelectric Power Plant ka la jan dep artad bad ka jingpyntreikam ia ka Dam Rehabilitation and Improvement Project (DRIP) ka la dep kumba 32%.Haba jubab ia ka Cut Motion u Bah Metbah ula ong, “Ka skhim ka kynthup ia ka jingpyndep pura ia ka jingshna pynbha bad pyndait tiar thymmai jong ka Umiam Umtru Stage-III Power Station, namar kane ka project, ka jingpynmih bording jong ka Umiam Stage-II kaba ju long 2×30 MW la khmih lynti ba kan kiew sha ka 2×33 MW, ka jingkiew ka jingpynmih bording da 6 MW.Ia kane ka project kaba kot ka jingpynlut T.407.36 klur, la pyntrei lyngba ka Externally Aided Project (EAP) ha kaba 77.6% la bei na ka JICA Official Development Assistance Loan bad 22.4% na ka Sorkar Jylla.

Ula ong, ka bynta jong ka project kaban bei da ka Sorkar Meghalaya kan kot ia ka T.91 klur bad ka jingmang tyngka ba T.80 klur ka long kaba donkam ban pyndep ia ka project.U Bah Metbah ula pyntip ruh ba ka jingpyntreikam ia ka Dam Rehabilitation and Improvement Project (DRIP) ka la dep kumba 32% bad kala iaid ha ka lynti kaba dei, ban lah ban pyndep hapoh u 2028 ban wanrah ia ka jingshngain bad jingshakri bha ki Dam ha Meghalaya.Ula ong ba ka Meghalaya kadei kawei na ki 18 tylli ki Jylla kiba shah kynthup ha ka DRIP Phase-II bad III, kaba kot ia ka jingmang pisa ba T.441 klur bala ai sha ka MePGCL. Ka project ba la bei da ka World Bank bad Asian Infrastructure Investment Bank, ban pynkhlain ia ka jingshngain bad jinglah treikam bha jong ki saw tylli ki dam : Umiam Stage-I, Umiam-Umtru Stage-III, Umiam-Umtru Stage-IV, bad Myntdu Leshka Stage-I.Ia kane ka project la pyntreikam da ka ram ba 80% na ka World Bank bad 20% ka jingbei tyngka ka Sorkar Jylla.

Ha kawei pat ka liang, u Myntri kam bording ula pyntip ba ka Meghalaya Power Generation Corporation (MePGCL) kala pyndep ia ki Detailed Project Report (DPR) haduh 12 tylli ki Hydro Power Project barit ba pynmih bording 63 MW bad mynjur ia artylli ki project ba ithuh hi (37.5 MW), kaba pynioh ei 12% ka bording bad 1% ka LADF ia ka Jylla.Ula ong ba ia ka soskular ban pyntreikam lah dep ban iasoi bad ka Power Distribution Corporation Limited ka Jylla kan iasoi ia ka Power Purchase Agreement ba 30% jong ki kor pynmih bording bala pyndait bad ki nongpynmih bording. Ka Jylla kan ioh ei 12% ka bording bad 1% ka LADF na baroh artylli ki project” ong u bah Metbah haba jubab ia ka cut motion ha Iingdorbar Thaw Ain ha ka sngi Palei.Ula iathuh ba ka Sorkar kala ai ka jingmynjur ban iasoi ia ka soskular pyntreikam na ka bynta ban shna ia ka Hydro Project kaba heh bad ka kompani shimet, hynrei, ka Jylla kan nym ioh ia kano kano ka PPA kan ioh ei ia 12% ka bording bad 1% ka LADF na kane ka project.