Ban shngain ki nongleit nongwan Hukum ka Sorkar ia ki kali kamai ban wah/tah ia ki jingtip jong u Dribar

Ka Sorkar Jylla ka la rai ban bthah ia baroh ki trai kali kamai (Tourist) ban wah ne pyndait ia ki jingtip jong u Dribar uba niah ia ka kali kamai jong ki. Ki trai kali ki dei ban wah ne pyndait ia ka thup jingtip jong u Dribar hadien ka jaka shong (Seat) jong u Dribar naduh ka kyrteng, dur, license, jaka sah, phone number bad kiwei kiwei de. Ki kali kamai ki kynthup ki kali kamai (Local Taxi), ki kali kamai Tourist, ki Bos, ki Sumo lait noh ki kali ba long trai da ki riew shimet (Private), ki kali Sorkar bad ki kali ba long trai da ki Corporation bad Undertaking ka Sorkar. Kane ka hukum ka kynthup ia baroh ki kali kamai ba shim jingbit na ki District Transport Officers (DTO) bapher bapher ban kamai hapoh ka Jylla Meghalaya. Ia kane la pyntip da u Myntri ka tnat Tourism u Bah Paul Lyngdoh hadien ba wai ka jingialang bad u Symbud Myntri Rangbah ba khmih ia ka tnat Transport u Bah Sniawbhalang Dhar.

Haba kren sha ki lad pathai khubor u Bah Paul ula ong, ba kane ka rai ka dei ban pynthikna ia ka jingshngain ki paidbah bad kumjuh ki nongwan shangkai pyrthei (Tourist) kiba wankai sha kylleng ka Meghalaya.U Bah Paul ula ong, kane ka jingbthah ia ki trai kali kamai bad ki nongniah kali kamai la leh ruh shawei ki Jylla ka Ri India ban ai jingshngain ia ki briew kiba shong kali khamtam ha ka por mynmiet.”Kane ka hukum kan treikam ha baroh kawei ka Jylla Meghalaya na bynta baroh ki kali kamai khnang ba ki paidbah bad ki nongwan shangkai pyrthei (Tourist) kiba wan kai bad leit kai sha kylleng ka Jylla kin don ka jingshngain ban leit ban wan por mynmiet” la ong u Bah Paul.

Ula bynrap ka jingthmu ba hakhmat jong kane ka buit treikam ka long ban lait na ki jingma ha ki kam runar ba la leh da kaba pyndonkam ia ki kali kamai. “Kane ka jingbthah kan wanrah shuh shuh ia ka jingsngew shngain hapdeng ki nongleit nongwan. Da kaba tip mano ba niah ia ka kali ba ki shong bad ki passenger kin kham sngew shngain” u la ong.