Ban tehlakam ia ki bad Jylla, pynkhreh ka Sorkar ban pynkhlain ia ka MRSSA me wanrah ain thymmai

U Symbud Myntri Rangbah ba khmih iaka tnat kam Pohiing (Police) u Bah Prestone Tynsong u la iathuh ba ka Sorkar ka don jingthmu ban khmih bniah bad nang pynkhlain ia ka Meghalaya Residents Safety & Security Act (MRSSA) lane ban wanrah da ka ain ba thymmai ban tehlakam ia ka jingnang kiew ka jingwan rung tuh ki briew na Bangladesh.Kane ka long kum shi bynta ban lah leh eiei halor ka jingnang kiew ka jingwan rung ki briew ba nabar shapoh ka Jylla khamtam naka Ri Bangladesh

Haba kren sha ki lad pathai khubor, u Bah Prestone ula ong ba ka Sorkar ka dang thew tarajur ia ki lynti la kan pynkylla ia ka ain MRSSA bala don lypa ne ban wanrah da ka ain thymmai kaban pyndap ia ki jingduna bad nang pynkhlain ia ki lad jingiada. “Ka Sorkar Jylla ka dang shong pyrkhat halor kane ka mat. Nga shimet nga sngew ba ka long kongsan bha bad ngi donkam kyrkieh ban don ia ki lad ki lynti hapoh ka Jylla” ula ong haba bynrap ba kine ha ryngkat ki ain ka Sorkar pdeng, kan nang iarap shuh shuh ia ki sienjam ban tehlakam ia ka jingwan rung ki mynder ri.

Da ka jingdon haduh 443 km ki jaka khappud bad ka Bangladesh, u Bah Prestone ula ong ba ka Meghalaya kala iakynduh ia ki jingeh kiba bun ban tehlakam ia ka jingrung tuh ki briew,khamtam haba bun ki mynder ki ju wan rung tuh na ki lynti bapher bapher kynthup naduh Kolkata, Rajasthan bad Bihar.