Beh ka KSU ia ki bar Jylla na Laban, maham ban ai wai iing ïa ki dkhar ba phetwir na Assam

Ka Khasi Student Union (KSU) Laban Circle haka miet 29 tarik u Nailar, 2025 ka la ïeng ap pahara ha kylleng sawdong ka thaiñ Riat Laban Dorbar Pyllun ban peit pyrman bad talasi ïa ka jingrung jingmih jong ki bar Jylla hapoh ka thaiñ. Ki dkhot ka KSU ki la ap pahara ha Red Cross, Iewdak ba hap ha Dorbar Laban, Mynsaiñ Ranab ba hap ha Dorbar Lower Lumparing, Clifford Nongrum Road ba hap ha Dorbar Kor bad ha Taxi Point ba hap hapoh Dorbar Shnong Lumshatsngi. Kane ka jingap pahara ka sdang naduh 4 baje haduh 9 baje janmiet bad ka daw ba ka Seng ka ïeng ap pahara ha surok syngkien bad naduh 4 haduh 9 baje janmiet ka long ban lah ban bat ïa ki mynder namar dei ha kum kane ka por ba ki ju mih na ka jingbylla ka jong ki ne wanphai ban sah ha ki iingwai jong ki sha Laban.

Ha kane ka jingap pahara na ka liang sa Seng ka la ioh bat ïa 58 ngut ki bar jylla bad na kine 22 ngut kim don kot eiei ruh ban pynshisha ïalade.Ka KSU ka lap ba bun ngut na kine ki bar jylla ki dei ki khar muslim kiba wan phetwir na Assam bad kiwei ki jylla bad ki ioh sah iing wai ha Laban khlem pyntip ïa ki Dorbar Shnong bad ki muslim kiba shong ba sah ha Laban bad Lower Lumparing hi kiba ai jaka rieh jaka sah ïa kum kine ki khar muslim kiba phet wir.

Kane ka la pynlong ïa ka Seng ba kan hiar ban leit sha ka Three Pine Colony (Laban) ba don kumba 80-100 tylli ki longiing muslim bad hangne ka la lap ba bun ngut ki longiing ki ai jaka sah ïa kine ki khar muslim ba phetwir bad na ka liang ka KSU ka la ioh ban beh noh ïa kine ki briew bad la aiti ïa ki sha ka Laban Police Station.Ka KSU ka ai ka jingmaham kaba tyngeh sha baroh ki nongshong shnong jong ka thaiñ Laban la ki dei ki Khasi, ne bym dei Khasi ne ki khar muslim ba kim bit ban ai wai sha ïa ki khar muslim kiba phet wir na Assam bad na kiwei ki jylla bad ha kajuh ka por ka Seng ka maham ruh ïa ki nongialam niam ha ki Masjid/Mosque ba kim dei ban ai jaka rieh ne pynshlur ïa ki para muslim ba ki dei ban ai jaka rieh ïa ki muslim.