Bitar ki paidbah ba leh donbor ka Assam ban jurip karkhana tyllait maw ha Killing

Ki ngut ki nongialam shnong bad ki riew paidbah ka thaiñ Killing ha Ri Bhoi District khappud ka jylla Meghalaya bad Assam mynta ka sngi ki la pynrem jur ia ka jingwan leh donbor da ki briew jong ka Assam kiba la leit ban rung bad leh myllen kumba khynra ia ki karkhana tylliat maw kiba don ha katei ka thain khlem da ai jingtip ne iohbor ruh na ki bor ba dei khmieh jong ki Shnong ki thaw jong ka thaiñ Killing. Kumba la ujor da ki nongialam shnong, kiba la pynpaw ia ka jingsngewkhia kaba jur halor ka jingwan leh jubor jong ki briew na ka jylla Assam, ki la shu rung jubor sha ki karkhana tyllaitmaw kiba don ha kane ka thain da kaba kam ba ki dei ki briew jong ka sorkar Assam bad ruh kiba mihkhmat na ka Iingkashari jong ka Assam bad kiba la iohbor ruh ban khynra ia kitei ki jaka.

La pynpaw ruh, ba ha ka jingpyrshang ban kylli halor katei ka jingwan khynra, ki nongialam shnong ka thaiñ Killing ki la ioh jingtip ba la lamkhmat ia kane ka kam jong ki nong Assam da u wei u Jitul Deka u ba dei u wei na ki briew ba don hakhmat bad ka sorkar Assam, hynrei haba ki nongialam shnong lem bad ki Nongthoh Khubor ka Ri Bhoi District ki la pyrshang ban kylli ne ia kren bad u halor kane ka jingkhynra u la kyntait ban ai jubab bad phet krad pynban na ka jaka ba ki dang khynra. Ki jaka ba ki briew ka Assam ki la leit ban khynra ki kynthup naduh ki jaka kiba hap ha u pud u sam ka skulbah University of Science and Technology Meghalaya (USTM) bad katto katne tylli ki karkhana tyllaitmaw, hynrei hadien ba ki Nongthoh Khubor ka jylla Meghalaya ki la pyrshang ban kylli bad wad bniah halor katei ka jingkhynra kitei ki briew na Assam ki la phet bak na katei ka jaka bad pynkut syndon ia ka jingkhynra jong ki.

Na ka liang ki nongshong shnong ka thaiñ Killing bad ki nongialam shnong ki la pynpaw ba kane ka dei ka jingiuhroit ia ka hok kum ki nongialam shnong ba kim burom shuh wat ban pyntip sha ki nongialam shnong haba ki leit ban khynra ne leh ia kano ka kam katkum ki kyndon ain, ha kaba ki al bynrap ruh, ba kane ka jingleh jong ki briew na ka jylla Assam ka la pynsuba jur ba ka lah ban don eiei sha lyndet tangban ioh nong ki katto katne ki heh na ka jylla Assam.