Bitar ki samla pule NIT Sohra bym pynbiang ki bor pyniaid ia ki jingdonkam

Ki samla pule jong ka National Institute of Technology (NIT) ha Sohra hynne ka sngi ki la mih paidbah ban pynpaw ia ka jingbitar halor ka jingbym lah ki bor pyniaid ban pynbiang ia ki jingdonkam jong ki samla pule ha kane ka jaka.

Ki samla pule ki la pynpaw ba ki don bun ki jingduna ki jingeh ba ki shem ha kane ka jaka pule kynthup naduh ka bam ka dih, ka um, ka jaka sah, ka bording nalor kiwei de.

Haba kren sha ki lad pathai khubor, kine ki samla pule ki la ong ba halor kine ki jingeh baroh, ki ladep pyntip sha ka bor ba dei peit halor ki jingduna bad ki jingdonkam jong ki, hynrei ka bor pyniaid kam shym la leh eiei satia bad kane ka la pynbitar ia ki samla haduh ba kin iamih paidbah.

Katkum ka jingong ki samla pule, la kynnoh ba ki bor pyniaid kane ka Institute ki la wanrah da ki nongshet kiba nabar, kiba shet ia ka bam ka bym iahap satia bad ka jinglong bad ka rukom bam kane ka thain ha kaba wat ka ja ruh bunsien ki ju ai da kaba long khawot.

“Ia ki nongshet ki wanrah nabar, ki shet katba ki mon, ka bam ka bym iahap katkum ka jinglong kane ka jaka. Teng teng ki shet ka bam kaba khawot. ”, la ong uwei u samla pule.

Une u samla pule ula bynrap ba ha ki khyndiat sngi, ki samla pule ki la rai ban Boycott noh ia ka bamja sngi bad ka bamja miet, hynrei la sahngeh noh shwa hadien ba ki bor pyniaid ki la kular ban pynbiang bha ia ka bam. Hynrei hadien kane ruh ki dang iai ioh ia ka bam ka bym biang bad kane ka la pyndom ia ki samla pule haduh ba kin da mih paidbah mynta ka sngi.

Nalor kane, ki la kynnoh ba ka bor pyniaid kane ka Insitute kam shym la lah ban pynbiang ia u Wifi, ka hostel jong ki kynthei ruh ki la pynsah da ki shynrang, kim pynbiang ia ka Gym ia ki kynthei, ka bording ruh ka lip khah khah bad ka jaka sah ruh ka jaw um haba slap.

“Ia ka hostel ki kynthei ruh la pynkylla lang sha ka Hostel shynrang bad la pynsah lang bad shynrang ha kajuh ka hostel, ka um dih ruh kam biang, ka ding ka lip khah khah, Wifi ruh um treikam ha kine ki sngi”, la ong kawei ka samla pule. “Hynrei ia kiba pule PhD, ki pynbiang ka bam, katba ia kiba pule ha ka kyrdan ba kham rit, ki leh bym suidniew”, la kam une u samla.