Bret pathar ki briew ia ki jaboh ha Nongrmai, ujor ejahar ka shnong

Ka Shnong Nongrmai kaba la ïoh ban khur haduh lai tylli ki award kum ka shnong kaba khuid kynthup ïa ka NGP Award na Delhi ha u snem 2011 ha kane ka kynti kaba mynta kala mad pynban ïa ka jingshah pynjaboh ka shnong daka jingwan bret ki briew ïa ki Huggies, ki Saniatary pad bad kiwei pat ki jaboh, ïa kaba ki la bret harud ka surok Mairang – Nongkhlaw. Ha kaba ïa dei bad kane ka jingwan bret pathar ki briew ïa kine ki jaboh, ka shnong Nongrmai kum shi bynta ban teh lakam ban pynneh ïa ka khuid ka suba hapoh ka shnong kala ujor daka ejahar sha Mairang Police Station pyrshah ïa ki briew kiba la wan ban bret ïa kitei ki jaboh bad naka liang ki pulit ruh ki la wan ban jurip bad leh ïa kaba donkam.

U sordar ka shnong Nongrmai u bah Shailes Nongrang ula ïathuh haba la peit bha na kitei ki jaboh la lap ïa ka song plastik bad halor katei ka song kaba dei ka song thied online ka don ka kyrteng jong kawei ka briew kaba na Mylliem. U bah Nongrang u la ong ba ka shnong kam kynnoh ïa kane ka briew hynrei ai ba ki pulit kin leh ïa kaba donkam ban lap mano ba wan bret ïa kine ki jaboh. U la ïathuh ruh ba kane kam dei shuh ka sien kaba nyngkong ba ki briew kin wan ban pynjaboh ïa ka shnong hynrei kham mynshwa kila don ki briew kiba la wan ban pynjaboh ïa ki um ki wah hapoh shnong da kaba wan bret ïa ki bilor dawai bad kiwei pat ki jaboh, u la ong ruh ba dang shen ha u bnai naitung mynta u snem kila don ki briew kiba wan bret ïa u masi kyrtong uba la ïap hapoh shnong bad ka shnong ka hap ban pynkhuid.

U bah Nongrang u la ong lada yn lap ïa ki briew kiba wan bret ïa kine ki jaboh, ka shnong kan leh da kaba tyngeh pyrshah ïa kine ki briew. Haka juh ka por u la kyntu ïa ki paidbah ba kin long kiba leh khuid ban sumar ïa ka mei mariang bad u la ïathuh ruh ba ka shnong Nongrmai ka ju peitngor bha ïa ka khuid ka suba bad ka ju pynkhuid ruh wat ïa ka surok PWD ar sien shi snem hynrei haba lap ba ki briew ki wan bret pathar ïaki jaboh kumne ka shnong ka dap da ka jingsngewsih.