Bthah ka Ïingbishar ban pyndep kloi ia ka project pynheh kad liengsuin Shillong Airport

Ka Iingbishar Meghalaya High Court hynne ka sngi, ka la bthah ia ki bor ba dei khmih ban pyndep kloi ia ki kam na bynta ban pyntrei ia ka project kad liengsuin Shillong Airport ha Umroi, Ri Bhoi District. Ka Division Bench ba kynthup ia u Chief Justice IP Mukerji bad Justice W Diengdoh haba tian bishar ia ka kaiphod kaba la aiti da ka Airport Authority of India (AAI) kala ong “Haba bishar ia kane ka kaiphod, ngi shem ba haduh mynta dang dep leh tang ki kam ba rit ba ria kiba donkam ban leh ha kaban pynheh bad shna bha ia ka Shillong Airport. Naduh mynta, donkam ban leh kham bun ki kam ha ka lynti kaba sted ban lah pyntreikam noh ia kane ka project ha ki sngi ban wan. Kumta, baroh ki bor ba dei khmih kin hap ban pynkloi noh ia ki kam ki jam kynthup ka Ministry of Defence, ka Sorkar Jylla, Airport Authority of India (AAI) bad ia u Director General ka Civil Aviaton”.

Ka Iingbishar kala bthah ruh ban suh lang ha ka affidavit ia ka jingthoh bala pynkhreh da ka Sorkar Jylla halor katei ka project, kaba hap ban smai da u Ophisar jong ka Jylla bad ban aiti sha ka Iingbishar hapoh ka 18 tarik u Naitung.Haba bishar ia kane ka jingthoh, ka Iingkashari ka shem ba donkam haduh 22 akar ka jaka na ka bynta ka project ha kaba 10.30 akar kadei kaba hap shim na ki bor shipai. Ka Sorkar Jylla kala mynjur ban thied ia 11.75 akar ka jaka ha ka dor ba T. 72,17,56,237 da kaba iasoi ia ki soskular iadie iathied bad ki trai jaka.

Ia kine ki jaka la khmih lynti ban thied hapoh u Naitung mynta u snem bad ka Ministry of Defence kala ai jingbit ia ka Jylla ba kan pyndonkam ia 10.30 akar ka jaka shipai ha Umroi Military Station, Shillong halor ka soskular bad ka Sorkar ba kan ai bujli ia ka jaka ba shongdor kumjuh sha ka Ministry. Ka Iingkashari kala buh ban shon gbishar biang ia kane ka kam ha ka 12 tarik Nailar, 2025.