Bthah ka Sorkar ïa ki bor District ban leh tyngeh ïa ki ba tih dewïong beaiñ

Ka Sorkar Jylla kala bthah iaki bor district ban leh daka ba tyngeh iaki briew kiba donkti ban tih dewiong beain bad haka juh ka por ban pynduh jait syndon ïa kano kano ka kam beain haba iadei abd dewiong. Ïa kane la pyntip da u Symbud Myntri Rangbah ba khmih iaka tnat kam pohiing u Bah Prestone Tynsong bad u la ïathuh ruh ba hapoh 10 sngi kan File iaka Affidavit ban aiti shaka Meghalaya High Court, haba iadei bad ka jingkhlad ki 27 ngut ki nongbylla tih dewiong ha Thangkso East Jaintia Hills. Haba kren shaki lad pathai khubor u Bah Prestone u la ïathuh ba haduh mynta ki kynhun ai jingïarap ki dang don ha Thangkso Mynsngat East Jaintia Hills bad ki dang bteng ban wad iaki briew kiba shah suba dang shah tap ne sahkut ha krem dewiong.

U Bah Prestone u la ong ba ka Sorkar kala shimkhia haba iadei bad ka jingjia ha Thangkso East Jaintia Hills bad dei na kane ka daw, kala bthah ïa baroh ki bor district hapoh ka Jylla ban leh daka ba tyngeh pyrshah, ïa kino kino kiba donkti ne thmu ban tihd dewiong beain.“Mynta ngi la dep shim iaka rai ba skhem daka ba hukum iaki bor district hapoh ka Jylla ban pynthikna ba kita ki kam tih dewiong beain kiba la jia ne kiba dang jia haduh kine ki sngi kidei ban duh jait noh bad kidei ban shah khang lut baroh” la ong u Bah Prestone.Haba kylli halor ka jingiai paw ki kam tih dewiong beain, u Symbud Myntri Rangbah u la ong “Peit ha kano kano ka jingjia kaba paw pyrthei, ki jaka ba don ka jingtih dewiong beain ki don haki jaka ba ha kyndong bha. Ka jaka ba bthei ka krem dewiong ha Thnagkso ka jngai ym duna 4 kynta naka surok bah, kata ruh hap ban leit daka kali 4 shaka”.

U Bah Prestone u la ong ruh ba ka Sorkar ka la shim ia ka rai ba thaw ia ka Judicial Inquiry Commission bad hadien ba la thung ia u Chairman, ka jingtohkit ba laitluid ka sdang khnang ban lap tynrai iaki daw bad ïa kiei kiei baroh, haba iadei bad ka jingjia ba sngewsih ha Thangkso.U la pyntip ba haduh mynta ki Pulit kila kem ïa 2 ngut bad ka jingthwet sa ïa kiwei kiba shah suba donkti haki kam tih dewiong beain ka dang iaid shakhmat.