Bthah ka sorkar ia ki skul ban kyntiew kyrdan shwa ban pdiang admission klas-XI

U Director School Education Literacy u Bah Banteilang J Kharshandi u la pyntip ba ka tnat Pule Puthi ka Sorkar Jylla ka la bthah ia ki District School Education Officer (DSEO) pynbeit bad ki skul kiba kwah pynkha Stream thymmai lane kiba kwah ban kyntiew sha ki Higher Secondary. Ïa kane u Director ka DSEL ula pyntip hadien ka jingïalang bad ki DSEO ban ïakren halor ka jingpynkhreh ban pdiang Admission na ka bynta Class XI khamtam hadien ba ka Jylla ka la sakhi ka jingkiew kynsan ka jingpass eksamin Class X hapoh ka Jylla. Haba kren sha ki lad pathai khubor u Bah Banteilang u la ong ba ka tnat Pule Puthi kan ap iaki jingpynbiang ki DESO hashuwa ban shim rai haba iadei bad ka jingpynkha Stream thymmai lane ban kyntiew kyrdan iaki School.

“Ngi la bthah iaki DSEO ban sam iaki Admission Forms naka bynta ban pynkha Stream thymmai naka bynta kito ki skul kiba kwah ban kyntiew kyrdan shaki Higher Secondary School bad hadien ba ngi la ioh pdiang iaki Form ngin sa rah shaka jingialang ka Kynhun Myntri ban ioh jingmynjur” la ong u Bah Banteilang. U Director ka School Education Literacy u la ong ba ka tnat kan hap bishar bniah bha hashuwa ban shim rai halor ka jingpynkha Stream thymmai haki skul ba kwah kyntiew kyrdan. “Lada ki don ki skul ba don tang 8-10 ngut ki khynnah skul kam iahap satai iaka Sorkar ban pynkha Stream thymmai namar kam don jingmut ban thung 4-5 ngut ki nonghikai” u la ong. Nalor kane u Director School Education Literacy u la ïathuh ba haka jingïalang la iathir sani halor ka jingdonkam ban sdang noh daka (Moring Shift) haki skul ban plie lad iaki khynnah ban iai bteng iaki jingpule.

U la ïathuh ba ka tnat pule puthi kala ioh jingtip ba ka Baghmara Government Higher Secondary School bad ka Capt Williamson Sangma Memorial College ki long kiba la kloi ban sdang noh daka Morning Shift. Shuh shuh Director School Education Literacy u la ong ba ka Sorkar ka kwah ban sdang noh iaka Class XI naduh 1 tarik Jylliew. “Ngi kwah ban sdang noh iaka Class XI naduh 1 tarik Jylliew hynrei kane kam pat dei ka rai ba khatduh namar ka tnat pule puthi ka dang ap iaki jingai jingmut na baroh ki DSEO” u la ong.