Bthah u Myntri Mondal ia u DC ban jurip ba tuid ki jaboh ha Wah Ganol

U Myntri ka tnad Bording u AT Mondal hynne ka sngi ula pynpaw ia ka jingsngewkhia halor ka jingtuid ki jaboh sha ka Wah Ganol kaba la poi shaduh ka jaka kaba don ka Dam. U AT Mondal ula ong ba kane ka jingjia kam dei satia kaba jia tang mynta hynrei kadei kaba la dep jia teng ruh mynshwa bad kam dei ruh ba ki paidbah ki wan ban bret jakhlia hi ha kane ka jaka hynrei kadei haba don ka jingther u lapbah, kumta u slap u kit lut ia ki jaboh jaibain bad ia ki niut bapher bapher kiba la pynmih na ki iew ki hat, ki jaka sah, ki jaka bam khana bad na ki jaka kiba don marjan bad kine baroh kila wan poi lut sha kane ka jaka kaba don kane ka projek.

“Kane ka jingjia ka dei kaba sngewkhia bha bad nga la iakren bad bthah ia u Deputy Commissioner ban shimkhia noh mardor halor kane ka jingjia. Ula leit ban jurip ia katei ka jaka hynin ka sngi bad lashai ka sngi yn sdang noh ban pynkhuid ia kane ka jaka kaba la lang ki niut ki nier bad yn phah ruh ia ki BDO ba kin leit sha ki shnong kiba don sha ki bynta kiba shajrong jong katei ka wah ban pynsngewthuh ia paidbah, kiba pyniaid ia ki Homestay bad ha ki iew ki hat badk in hap ban bteng ban khmih bniah ia kane lem kumta kan iai bteng ban long kumjuh lada wan u slap un kit lut ia baroh ki niut ki nier” ong u Mondal haba iakren bad ki nongthoh khubor. Ha kaba iadei bad ka jingpynkhuid ia katei ka wah, u Mondal ula ong, ba ka Meghalaya Power Generation Corporation (MePGCL) bad hynne ka sngi kila lum ia ki briew kiba tbit ban lum ia kitei ki niut ki nier bad naduh dang step lashai ka sngi kin sdang noh ban pynkhuid ia katei ka jaka kaba lang ki niut ki nier bad ki jaboh jabain.

“Kane ka jingpynkhuid kadei kaba tang mynta, hynrei nangne shakhamt ngi hap ban leit pynsngewthiuh ia ki paidbah ha kio bynta ba shalor jong ka wah ba kim dei ban bret ia ki niut ki nier shapoh Wah namar ha ka por bym don slap ki neh beit ha katei ka jaka hynrei tang shu la ther u slap kine ki niut ki wan tuid lut baroh sha ka jaka kaba don ka dam” ong u Myntri Sorkar . U Mondal ula ong ruh ba ula iakren ia kane ka jingjia bad u Myntri Rangbah ka jylla u Conrad K Sangma bad ula mynjur ia ka jingdonkam ban shim ia ki sienjam kiba biang ban tehlakam b akum katei ka jingjia kam dei ban bteng ban jia biang.