Bthei ka liengsuin ha South Korea, iap 179 ngut

Palat 179 ngut ki briew ki la iap na ka jingbthei bad kem ding ka liengsuin Jeju Air hynne ka sngi u Blei ha ka por ba dang hiar ha kad liengsuiñ ha nongbah Muan kaba jngai kumba 290 kilomitar shaphang shathie na nongbah Seoul, South Korea. Ka Transport Ministry ka iathuh katei ka jingjia ka la jia ha ka por 9:03 baje mynstep hadien ba katei ka liengsuin ka la syntuid bad iaid shabar bad leit tynrah ïa ka jingker kynroh maw bad ki bor pynhiar liengsuiñ kim shym la lah shuh ban pyntreikam ia ki kor ki bor ha kaba ka la bthei bad kem ding syndon. La iathuh ba katei ka liengsuin ka dei kaba wan phai na Bangkok kaba kit ïa 173 ngut ki nong South Korea bad ar ngut ki nong Thailand bad kumjuh ruh hynriew ngut ki nongtrei liengsuiñ. Ka National Fire Agency ka la iathuh ba ka ding ka la jan lah ban pynlip hynrei ki ophisar ki dang pyrshang ban sei ia ki briew na ka liengsuin.

Kiba bun na ki 181 ngut ki briew kiba don ha katei ka liengsuiñ la suba ba ki la ïap lait noh tang ar ngut ki la sei ar ngut ki briew uwei u nongleit jingleit bad uwei u nongtrei ka liengsuin kiba la pyllait im ha ka rta ba 33 bad 25 snem, ong ka khubor na ki bor pynlip ding ba la pyndonkam 32 tylli ki kali pynlip ding bad katto katne tylli ki liengsuin ban tem ia ka ding bad ka jingtrei ka  dang iaid shakhmat ban sei ia ki met iap. Ki bor pynlip ding ki la antad ba katei ka jingjia aksiden ka lah ban dei na ka jingshah tynrah ki sim kaba pynlong ia ki kor ki bor ban sniew. Kat kum ki dur ba la pyni da ka telebishon YTN, ki pyni ka liengsuin Jeju Air ka la syntuid ha kad liengsuin, bad ka jaka hiar liengsuin ka dang khang, kumta ka bynta shakhmat ka la tynrah ia ka kynroh maw kaba don shabar.

Ki heh ka tnad Emergency ki la iathuh ba ki dang tohkit halor katei ka jingjia bad ka lah ban shim por da ki bnai haduh ki snem ban lap ia ka daw thikna jong katei ka jingjia aksiden. Ka dei kawei na ki jingjia ba shyrkhei tam ha ka histori tnad liengsuiñ ka South Korea. Ka sien ba khatduh ba ka South Korea ka la mad ïa ka jingshah pynjulor ha suiñ bneng ba shyrkhei ka dei ha u snem 1997, ha kaba ka liengsuiñ ka Korean Airlines ka la hap ha Guam, ha kaba 228 ngut ki briew ki la ïap