Buh jingtyrwa ka sorkar sa 3 tylli ki lynti ïaid hati

U Myntri Rangbah ka jylla u Conrad K. Sangma ula pyntip ba ka sorkar ka la tyrwa sa lai tylli ki lynti iaid ki hati khlaw nalor ki hynriew tylli ki lynti (Elephant Corridor) kiba ka ladep ban pynbna paidbah. Haba jubab ia ka jingkylli ba la wanrah da u MLA ka Kharkutta u Rupert Momin, u Conrad ula iathuh ba ka sorkar ka la buh ia ka jingtyrwa ban buh ia ka Beat ophis bad ka Range Ophis ban peit ia ki mrad. Halor ka jingkylli u Rupert Momin halor ki sienjam ba ka sorkar ka shim ban iada ia ki Hati kiba wan rung na jylla Assam sha Meghalaya ban wan wad bam. U Myntri Rangbah ula ong ba ka sorkar jylla ka la pyllong ia ki prokram pynshai paidbah khamtam kito ki paidbah kiba iaid lyngba kito ki lynti bad ka la buh ruh ia ki kynhun iarap  ki Volunteer Protection Squad ha ki shnong bapher bapher da kaba pynbiang ruh ia ki jingdonkam jong ki. Nalor kane, la thung ruh ia ki jait jingthung kiba ki hati ki sngewtynnat ha ki jaka ba ki ju iaid.

Ha kane ka sngi, na ka liang u bah Suin ruh ula pynsngew ba ki don 6 tylli ki hati na thain South West Khasi Hills kiba la wan ha Mawsynram ha u snem 2025 bad ki la pynjot ia ki jingthung jingtep kiba don ha pynthor kba. Na ka liang u Myntri Rangbah ula kular ba ka tnad kan sa shim khia bad iada ia ki paidbah bad ki jingthung bad kumjuh ia ki hati. U Myntri Rangbah ula pyntip ruh ba ki don haduh saw tylli ki wildlife sanctuary-Nongkhyllem, Siju, Baghmara, Narpuh-bad artylli ki National Park-Balpakram bad Nokrek, haba bynrap ba ki dang don sa artylli ki sanctuary ki ba dang khmih lynti bad kine ki don ha Baghmara bad Riatkhwan. Ha kajuh ka por, na ka liang u Dr. Mukul Sangma ula ong ba ka jingkha roi jong ki dkhiew kala nang jur namar ka jingpyniap ia ki Kyrbei (Pangolin).

“Ka jingbym don ki Kyrbei kala wanrah ia ka jingma, ka jaka ri mrad jong nga kala kha roi tang da ki dkhiew” ong u Mukul haba kyntu ban pynlong ia ka jingialang pynsngewthuh paidbah bad ka jingpyrshang ban pynkynriah jaka sah ia kine ki mrad.U Myntri Rangbah ka Jylla Conrad K Sangma ula ong ba ka Sorkar kan sa shim ia ki sienjam ban ai jingiada ia ki Kyrbei. “Ki kam kiba bun kila iaid mynta ban nang pyniar ia ka jingshakri ki bor Sorkar. Shisien ba la ai jingbit ia ka mang tyngka, kine ki Ophis, Beast bad Range kin sa mih”, ula ong.