Buh maw Nongrim u MR ia ka skhim ba T.400 klur ban ai um ha Tura

U Myntri Rangbah ka Jylla Conrad K Sangma ryngkat bad u Myntri ka tnat PHE, u Marcuise Marak hynne ka sngi ki la buh ia u Mawnongrim na ka bynta ban tei ia ka Greater Tura Urban Water Supply Scheme ha ka jinglut ba T.400 klur. Haba kren ha ka jingialang kaba la long ha District Auditorium, Tura West Garo Hills, u Conrad Sangma ula ong, ba kane ka sngi kadei ka sngi ka ban sah jingkynmaw naka bynta ki paidbah ka Tura baroh kawei ha kaba yn sdang noh ia ka jingthmu ban pyntreikam ia kane ka projek ban sam ia ka umbam umdih bad ula ong ba ia kane ka Scheme la thmu naduh u snem 2004 da u (L) Purno A Sangma hadien ka jingsakhi ia ka jingeh kaba mad da ki nongshong shnong ka Tura  ban ioh ka umbam umdih kaba thikna.

 Ula ong, ka jingpyntreikam ia kane ka projek ka long kaba donkam bha namar ym tang kan pynbit pynbiang iaka jingdonkam ia ka um hynrei ka jingshna iaki jaka pyllang um kan long ruh kum ka jaka jngohkai pyrthei, ki jingdonkam na ka bynta ka tnad ri dohkha bad kan pynbiang um ruh na ka bynta ka rep ka riang bad kiwei kiwei ki kam kiban ai jingmyntoi ia ki paidbah.U Conrad ula ong ba kadei lyngba ka jingkyrshan na ka Special Assistance on Capital Investment ka Sorkar Pdeng la ioh ban buh ïa u mawnongrim ban pyntrei iaka Greater Tura Urban Water Supply Scheme ha ka jinglut kaba lah jan kot ia ka T. 400 klur bad ia kane ka project la buh thong ban pyndep hapoh 24 haduh 36 bnai bad ula kyntu ia ki Nokma bad ki paidbah ban ai ia ka jingiatreilang na ka bynta ban sumar bad pynneh ia ki jaka pyllang um kiba don ha ka thain.

 Katba u Marcuise Marak ula ong, ba ka jingioh ia katei ka skhim kadei hapoh ka jingïalam jong u Myntri Rangbah ka jylla bad ha ki snem kiba la dep tang 4550 tylli ki longïing ha ki thain nong kyndong kila ioh um ha ki tyllong iing hynrei mynta kumba 5 lak tylli ki longïing kila ioh um lyngba ka skhim JJM. Ula kyntu ïa ki paidbah ba kidei ban shim ïa ka jingkitkhlieh bad ban sumar bha ïa ki jaka ba la ai da ka Sorkar khnang ba ki kam pynroi hapoh ka jylla kin  ïaryngkat kyrdan bad ki kam pynroi ha kiwei ki jylla kiba don hapoh ka ri.