Buh mawnongrim u Bah Sanbor ban pyntrei ïa ki 5 tylli ki kam pynroi

U MLA ka South Shillong konstitwensi u Bah Sanbor Shullai hynne ka sngi u la buh ia u maw nongrim ban pyntrei ia ki 5 tylli ki kam pynroi ha Upper Lumparing. Kitei ki skhim ki kynthup ia ka jingshna ia ka surok kali ha Wah Shyngiar Lumdorbar Upper Lumparing Shillong hapoh ka skhim PWD SPA 2024 ha ka jingmang pisa kaba T.1,38,63,000, ka surok kali ha (L) Brooming Marbaniang ha Lumdorbar Upper Lumparing Shillong kaba la kot sha ka T.3,02,08,000, ban shna ia ka aqueduct slab drain na ka jaka buh um ha Upper haduh Lower Lumparing Shillong hapoh ka skhim PWD SPA-2024 haka jinglut kaba T.91,61,000 bad na ka bynta ka skhim Greater Water Scheme lyngba ka AMRUT haka jinglut T.3,13,000,00.

Nalor kane u Bah Sanbor u la plie paidbah ruh ïa ka surok bala dep pyndep ha Madan Laban lyngba ka skhim PWD SPA haka jinglut kaba kot T.1,77,83,000. Haba kren ha kane ka sngi u Bah Sanbor u la ong ba ki paidbah ka Shillong South constituency kim donkam satia ban leit shah thngan ha pyrshah Secretariat namar u don ma u kumu nongmihkhmat ban pynpoi lut ia ki jingdonkam paidbah wat haduh jingthiah ruh.

U Bah Sanbor u la iaroh iaki paidbah ka South Shillong daka ba ong “Ki nongshong shnong kidei kiba stad namar ki kloi ban ai jaka ban pyntrei iaki kam pynroi”. U la ong ba paidbah ka South Shillong constituency ki shem phang namar ki tip kine ki kam pynroi ki ai jingmyntoi ym iaka lawei ba mynta hynrei wat iaka pateng ka ban sa wan.