Buh Mawnongrim u Conrad ban tei Addl Secretariat T.156 Klur ha Tura

U Myntri Rangbah ka Jylla Conrad K Sangma hynne ka sngi Palei, ula buh mawnongrim na ka bynta ban tei ia ka Additional Secretariat Complex ha Dakopgre, Tura ha ka jinglut jingsep kaba kot T.156 klur. U Myntri Rangbah ula ong, ba kane ka project kadei ka khana ha ka histori na ka bynta ki paidbah ka jylla khamtam eh ia ka rilum Garo bad ha kane ka jingialang la wan ban iashimbynta kumba 8000 ngut ki paidbah. “Ka dei ka sngi ia iwei pa iwei ban kynmaw. Ngi dei ban pynpaw ia ka jingsngewnguh ia u Trai nongbuh nongthaw. Ka Additional Secretariat Complex kan ym dei eh tang ka jingtei ne Building, hynrei ka sakhi ia ka jingphla ia ka jingpynurlong ia ka jingangnud jong ki paidbah” ong u Conrad. U Myntri Rangbah ula ong, ba ka Additional Secretariat kan ai jingshakri ia ki paidbah ka rilum Garo, kiba la mad ia kiba bun ki jingeh ban ioh ia ka jingshakri na ka sorkar jylla. Kane ka Additional Secretariat kan ai jingshakri ia ki 5 tylli ki District jong ka rilum Garo.

Ula ong ba kane ka project kan don lai tylli ki jingtei bad ka Chief Minister’s Complex yn sa pyndep noh hapoh u Kyllalyngkot 2027. “Ki paidbah ki lah ban peit nangne shakhmat ba kin sa ioh pdiang ia kiba bun ki jingshakri na ka sorkar napoh Tura. Kumta, kane ka dei ka project kaba kongsan bha ia ka jylla khamtam eh ia ka rilum Garo bad ia ki nongshong shnong ki jongka” ula ong.U Conrad ula pyntip ruh ha katei ka jingialang halor kaj ingiaid shakhmat ban tei ka Secretariat kaba thymmai ha Shillong ha ka jinglut jingsep kaba kot T.1800 Klur. “Ngi la tei ia ki jingtei ki bapher, da kaba buh hakhmat na ka bynta ka 100 snem kaban wan. Ngi kwah ban pynthikna ba ka jingai jingshakri ki bor synshar kan long kaba jan bha ia ki paidbah bad kaba ki lah ban ioh ha kano kano ka khyllipmat” la ong u Myntri Rangbah.

Ula pyntip, ba da ka jingthmu ban pynthikna ia ka roi ka par kaba mar katjuh ha kylleng ki bynta jongka Jylla, ka Sorkar kala pynwandur thikna ia ki jingthmu na ka bynta ki District bad ki Block.“La kadei ka Block ophis kaba thymmai, ki building jongka Sub Division kiba rim bad thymmai, ki District Office, ki jingtei jong ki jaka ai jingsumar, ki Pulit ne ka Pule Puthi, ngi la pynleit jingmut ba kan don ka roi ka par kaba kyllum na ka bynta ka jylla” la ong u Myntri Rangbah bad ka pyntip ruh ba ka sorkar ka don jingthmu ban tei ia ki Mini Secretariat ha Jowai bad Pynursla. Ha kane ka jingbuh mawnongrim la iadonlang u Lamphang ka Iingdorbar thawain ka jylla u Thomas A Sangma, u Symbud Lamphang u Timothy D Shira, u Symbud Myntri Rangbah ka jylla u Bah Snaiwbhalang Dhar, ki Myntri Sorkar kiba kynthup ia u AT Mondal, Marcuise Marak, Bah Shakliar Warjri, Rakkam A Sangma, Bah Paul Lyngdoh, Kong Ampareen Lyngdoh, Bah AL Hek, Bah Comingone Ymbon bad ki MLA jong ka rilum Garo.