Buh mawnongrim u MLA ia ka iing ka Mawthoh Pastorate ha Mawlyngkhung

Ka Mawthoh Pastorate kaba hap hapoh ka Ri Bhoi Sepngi Presbytery Jong ka Ribhoi Presbyterian Synod hynne ka sngi ka la ïoh ban buh Mawnongrim na ka bynta ban tei ïa ka Ïing jong ka Pastorate ka ban long kum ka Shlem treikam jong ka Mawthoh Pastorate ha ka Shnong Mawlyngkhung, Ri Bhoi District ha ka jinglut ba T.60 lak tam.

Kum ban shu kdew, Ïa ka Mawthoh Pastorate la seng haka 23 tarik Jymmang, 2023 hadien ba dep ban mih naka Mardon Pastorate bad hapdeng kitei ki 3 snem, ka Pastorate ka la nang pynïaid bad pyntyllun ïaki kam hynrei ki don pat ki jingeh kiba kum ka Pastorate kaba thymmai ka hap ban mat hakaba ia dei bad ka jingpynlong iaki jingialang bad ban pyntyllun iaki kam la bun sien la shu hap ban pyndonkam iaki jaka jong kiwei.

Ha kane ka sngi ka la long shisha ka jingkyrkhu bad kaba dap daka jingkmen hakaba ka Mawthoh Pastorate ka la ioh ban buh ia u Mawnongrim ban tei ïaka shlem treikam kaba pura na ka bynta ban pyntyllun iaki kam jong ki Balang kiba hap hapoh ka Mawthoh Pastorate bad kumjuh ruh ban ioh ban pynlong ia ki jing ai jinghikai sha ki khun samla naduh ka Vocational training, Ka jinghikai rwai bad jinghikai tem bad kiwei kiwei kaba kum ka Pastorate ka i donkam ban leh naka bynta ka burom jong u Blei.

Ïa utei u Mawnongrim la wan ban plie da u MLA ka Mawhati u Bah Charles Marngar uba dei ruh u Adviser ka Sorkar Jylla uba la shim iaka bynta kum u kongsan haka jingiadonlang u Bah Ransom Sutnga uba dei u Co-Chairman Ka MIDC kum u Symbud Kongsan ha kaba la sakhi ia ka jingiadonlang ki Nongialam Niam kiba kynthup ia u Rev. E.S Syiem bad u Pastor I.S Makdoh kiba dei ki Pastor Incharge jong ka Mawthoh Pastorate lem bad ki tymmen basan, Ki Longkmie bad ki Nongkitkam kiba hakhmat jong ka Pastorate.

Haba kren ha katei ka jingialang, Na ka liang u bah Charles Marngar kum u Nongmihkhmat katei ka thaiñ, ula ong haba sdang ban tei ia kano kano ka Kam, kam long kaba suk hynrei haba ngi don pat ïa ka jingiatylli ban ia kyrshan lang kan nym don ka jingeh ban pyndep ia kano kano ka jingthmu.

U Bah Charles Marngar ha katei ka jingkren, u la Pynpaw ba kum u MLA un kner ka kti ban ïarap 10 lakh tyngka na ka skim jong u naka bynta ban ioh sdang noh ia ka jingtei ïaka Ïing bad u la Pynsngew ruh ba un nym pat ih noh hynrei un dang ïai pyrshang ban wat lad wat lynti ban pynioh iaki lad jingrap haduh ban da ïeng katei ka iing jong ka Mawthoh Pastorate.