Buh mawnongrim u Myntri Rangbahban tei ïa ka Secretariat kaba T.1188 klur

Ha ka sngi rakhe ia ka jingdap 53 snem ka jylla, u Myntri Rangbah ka Jylla u Conrad K Sangma hynne ka sngi, ula buh ia u maw nongrim ban tei ia ka Secertariat kaba thymmai jong ka Shillong Administrative City ha Umsawli, New Shillong, ia kaba la mang ban pynlut pynsep haduh T.1188 klur. Ha kane ka jingbuh mawnongrim la iadonlang ki Symbud Myntri Rangbah kiba ky thup ia u Bah Prestone Tynsong bad Bah Sniawbhalang Dhar, ki Myntri Sorkar kiba kynthup ia u AT Mondal, Kong Ampareen Lyngdoh, u Marcuise Marak bad u Bah Comingone Ymbon. Ia kane ka Secretariat bathymmai yn tei ha ka jaka kaba don 53 Akar nalor kane yn tei ruh ia ka Directorate Campus ha ki artylli ki wat, ka Complex kaban don 68 tylli ki Ophis, ka Auditorium bad ki kamra na ka bynta ki 1929 ngut ki nongtrei. Ha ka bynta baar jongka Complex yn tei ha kaba 1.15 lak sq.m ka jaka, ia kaba la mang ia ki Directorate bad 56 tylli ki Ophis, ki kamra ia ki 4746 ngut ki nongtrei bad artylli ki Auditorium.

U Myntri Rangbah ula pyllait paidbah ruh ia ka skhim kaba kot T.63 klur na ka bynta ki 6000 ngut ki nongioh jingmyntoi kiba dei na ka CM-ELEVATE, FOCUS, Green Meghalaya+, ki project kiba iadri bad ka kam jngohkai bad kiwei kiwei. U Myntri Rangbah ka Jylla ula ong ba ka jingbuh mawnongrim kam dei eh tang ban tei ia ki jingtei hynrei kadei ka jingpyniar ia ka Nongbah Shillong.“Kane kam dei ka video kaba la shna da ka Artificial Intelligence (AI) hynrei kadei ka jingpynwandur jong ka jingtei ba shisha kaban sa mih hangne, kaba la shimpor ia ngi la palat shisnem ban pynkhreh bha” la ong u Conrad haba ai jingkren. “Haba ngi kynshew ha kane ka Secretariat, haba ngi kynshew ha kiba bun ki surok ba pyniasoh ia ka Nongbah kaba la don lypa bad kane ka Administrative City bathymmai. Ngi la buh ia u mawnongrim na ka bynta ki shnong ki thaw, ki paidbah, ki trai jaka ha kumba 30 sq km ba kin pynroi ia kane ka New Shillong kum ka jaka ka roi ka par jong ka Jylla jong ngi” ula ong.

Ula onh, ka Sorkar ka don ruh ia ka jingthmu ban kynshew haduh T.5500 klur ban pynroi ia ka thain New Shillong kynthup sa kumba T.10,000 klur ka jingkynshew kaba dang pynkhreh bad kane ka jingkynshew kan pynkylla dur lut ia ka New Shillong. Katba u Bah Sniawbhalang Dhar ula ong ba kane ka jingtei ba thymmai kadei kaba la buh nongrim ban pynkupbor ia ka lawei jong ka Jylla. Na ka liang u Bah Prestone Tynsong ula ong, ba kane ka Secretariat kaba thymmai kadei kaba la angnud da u Myntri Rangbah u Conrad K Sangma ban pynthikna ba ki jingshakri ka Sorkar bad ka synshar ka khadar kan iaid beit iaid ryntih noh na ka sor Shillong kaba thymmai.