Buh thong ka BJP ban pynkhlain ha Meghalaya ban pynkhreh ia ka ilekshon MLA 2028

U Vice President barim ka Bharatiya Janata Party (BJP) Meghalaya u Gagan Jain hynne ka sngi ula ong, ka Party ka la buh thong hakhmat ban pynkhlain biang ia ki nongtrei hapoh ki lai snem ban wan. Ïa kane ka rai la shim kum shibynta ban pynkhreh ilekshon MLA 2028 ha kaba ka Party ka buh thong ban jop bun tylli ki seat hapoh Meghalaya. Ha shuwa kane ka BJP hynne ka sngi ka la plie paidbah ia ka State Level Exhibition ban pyni paidbah ia ka jingiaid lynti ka seng BJP hapoh ka ri India ha ka 12 tarik, Iaiong ha ophis treikam jong ka Party. Haba kren sha ki lad pathai khubor u Gagan Jain ula ong ruh ba ka BJP ha Meghalaya ka la rai ban pynkhlain shuh shuh ia ka party da kaba pynshlur ia ki paidbah ba kin pyniasoh kum ki dkhot bad ki nongtrei jong ka party.

“Kumta ka jingiaid ban pynkhlain ia ka Party naduh ki shnong ka la sdang bad ha ka jingialam jong u Rikman Momin, ngin bteng ban pynkhlain ia ka BJP ha Meghalaya bad ngin pynshlur ia ki (Nongtrei) karyakata ba shisha ban mih shakhmat ha baroh ki mandal” la ong u Gagan. Ha kane kajuh ka sngi, ka BJP Meghalaya Pradesh ka la pynlong ruh ia ka jingialang kynmaw burom ia u Kpa jong ka Riti Synshar ka ri India u Bhimrao Ambedkar da kaba kynmaw tympang ia u synniang u bynhei ba ula noh sha u sup u thiar jong ka imlang ka sahlang hapdeng ki jaidbynriew nongshong shnong jong ka ri India.

Ka Party, ha kane ka sngi ka la pynlong ruh ia ka jingiathir iatai halor ka Waqf (Amendment) bill ban pynshai ia ka jingshah ialam bakla ki paidbah halor ka jingpynlong ain da ka Sorkar NDA ba ialam da ka BJP ia kane ka ain rew ha Parliament.