Buh thong ka Nongstoin Block ban pyndep 4140 ki iing na ka shkim PMAY-G

Ka long ka sngi kaba kham kyrpang na ka bynta ka shnong Nonglwai, Nongstoin, ha dien ba na ka liang ka ophis jong u Block Development Officer, Nongstoin ka la pynlong ia ka jingialang ba kyrpang ban rakhe ia ka “Grih Pravesh” kaba dei ka jingleh burom ba kyrpang hadien ba la pyndep ia ka jingshna ia ki iing kiba dei hapoh ka skhim Pradhan Mantri Awaas Yojana Gramin (PMAY-G). Ha katei ka jingïalang ba la pynïaid da ka ophis u Block Development Officer, Nongstoin C&RD Block, la donlang da ki riew kongsan ba kynthup ïa u MLA ka Nongstoin, u Bah Gabriel Wahlang kum u Kongsan, u Bah M. A. Challam, ADC WKH, u BDO ka Nongstoin C&RD Block, T. Diengngan bad kiwei kiwei.

Katkum ka kaiphod la iathuh ba ka Nongstoin Block ka la buh ka thong ba heh kaba 4140 tylli ki ïing PMAY-G bad na kine 3238 tylli la dep ban shna bad 902 tylli ki dang iaid shakhmat ban shna. Ha ka jingkren kum u kongsan ha katei ka sngi, u MLA ka Nongstoin, u Bah Gabriel Wahlang, u la ban jur ïa ka jingdonkam jong ka skhim PMAY-G bad u la kyntu ïa ki nongshong shnong ban jop ïa ka jingsheptieng haba ïa dei bad ka jingpynrung kyrteng ha ka Aadhaar.

U la kdew ba bun ki briew ki duh noh ïa ki jingmyntoi na ka sorkar namar ka jingbym don Aadhaar Card bad u la kyntu ïa baroh ban shim ïa ki lad ban kyntiew ïa la ka jingim. La pynkut ia katei ka jingialang da ka jingkular Awaas Diwaas lane la Awaas Diwaas Pledge da baroh kiba don ryngkat ha katei ka jingialang kynthup ïa ki kongsan bad ki nongshah khot sngewbha.