Bun bah ki jingïathir ha ka dorbar KHADC kaban sdang ha ka 18 tarik : Chairman

U Chairman ka Khasi Hills Autonomous District Council (KHADC) u bah Strongpillar Kharjana, ula iathuh ba kin don shibun ki mat ban iatai iathir ha kane ka Dorbar kaban sdang naduh ka 18 tarik haduh ka 20 tarik Rymphang, 2026. U bah Strong Pillar Kharjana, ula ong ba ha kane ka shi snem ha ka samoi kaba lyngkot kaba ula pyniaid ia ka Dorbar, ula sakhi ia ka dorbar kaba shongshit kaba itynnad na ka jingiatai ki dkhot halor ki mat ki jura bapher bapher. Ha ka jinglap jong u, kum u chairman, ka jingiatai ka dei kaba myntoi na ka bynta ban iatei ia ka Council bad ka jaitbynriew, ym tang ban ia kawang ktieh.

“Ka la don ki khep haba kaba ka don ka jingiatai kaba la neh shisha bad ki jingiatai kam dei ba ia kawang ktieh hynrei ka jingiatai ka long ban iatei”, ong u bah Strong. U bah Strong ula ong ba ka jingdon ki MDC ba kham rangbah na ka liangiatei ka la iarap ia ka jingiatainia kaba myntoi ia ka Council bad ia ka jaitbynriew bad kumjuh ka jinglah ki MDC na ka liangsynshar ka la pyni ia ka jingtbit jongki kumba la sakhi ha ki dorbar kiba la dep. “Ki don ki khep ba mih ki jingiatai ha dorbar ha kaba na ka liang ki MDC ka liangiatei kila sei ia ki nia ki jutang jongki bad na ka liang ka EC ruh kila ai ia ki nia ki jutang jongki. Nga iohi shisha ia ka dorbar kaba itynnad shisha ha kaba la iatai ia ki mat kiba ktah hapoh ka KHADC.

Ka jingdon ki MDC kiba kham rangbah na ka liangiatei ka la iarap shibun eh ban wanrah ia ka iing dorbar kaba myntoi shisha, ym tang ia ka Council hynrei ia ka ri bad ka jaitbynriew, bad na ka liang watla ka EC ruh ka dang thymmai hynrei kila pyni ia ka jingtbit ka jinglah jong ki”, la ong u Chairman. Ha ka KHADC, la synshar ka Voice of the People Party (VPP) kaba don 18 ngut ki MDC ha ka iing kaba 30 ngut. Kiba shong ha ka liangpyrshah ki long ka UDP, NPP bad ka HSPDP.