Bym bud kyndon ka EC barim Kynduh jingeh ka Council ban ioh skhim na ka Finance Commission

U Executive Member (EM) ba khmih ia ka tnat Elaka, u Bah Powell Sohklet, u la kynnoh ba ka jingbym bud ka Executive Committee (EC) barim ka Khasi Hills Autonomous District Council (KHADC) ia ki kyndon ka 15th Finance Commission ka wanrah jingeh ia ka Council ban ioh ia ka 2nd instalment jong ka (Tied & Untied) grant. Ia kane u EM ula kynnoh haba jubab ia ka jingkylli ba la wanrah da ka MDC ka Nongsken Constituency, ka Kong Grace Mary Kharpuri. Ha ka jubab, u Bah Powell ula ong ba hadien ba la pyndep ïa ki kyndon jong ka 15th Finance Commission, hynrei ula bynrap ba ym lah ban pynthikna ia ka por ba lano kin ioh ia ka 2nd instalment jong ka Tied bad Untied grant jong u snem 2021-2022. Ha shuwa kane ka Kong Grace ka la pynpaw ia ka jingbym hun, da kaba ong ba wat la ka EC mynta ka la iaid la 8 bnai, kam pat lah ban pynthikna ia ka por ban pynioh ia kane ka Grant, kaba buh jingeh ym tang ia ka MDC hynrei ia ki constituency ba pher bapher.

Ka Kong Grace kala kdew ba ia ka 1st Instalment la dep ban ioh, bad ka jingpynslem ban ioh ia ka 2nd instalment ka la buh jingeh ban pyndep iaki projects bad ki skhim bala dep sam Work Order. Haba jubab ia kane u EM ula ong ba ka Council ka hap ban pynbiang ia ki kyndon ba la buh da ka 15th Finance Commission khnang ban ioh ia kane ka bhah pisa. U EM ula kdew ruh ïa ki jingeh teknikal bad ka jingdonkam ban ïaid ïa ki jingïalang bad ka DCA bad ula pyntip ba la phah ïa ka shithi sha ka Ministry, nalor ka jingsiew pisa kaba mynta ka la iaid online, bad kane ka EC ka dang pynbeit ia ki bill. U la pynpaw ba u don kyrmen ba ynda la iaid ka online payment, ki contractor baroh kin sa lah ban ioh noh ia ka bill jong ki.

U Bah Powell Sohklet u la iathuh ba ka jingeh ka long namar ba ka EC barim kam shem la leh online, wat la ka la sdang naduh u snem 2020-2022.”Ki khlem leh eiei bad ki khlem bud ia ki kyndon ka Commission kaba pynlong pat ban sahkut lut ki kam ki jam ynda ka VPP ka la wan ha ka bor ha u snem 2025″ ula ong.U la kdew ba ka EC mynta ka dang trei shitom ban pynioh ia kane ka skim bad ula iathuh ba iaka online payment, ki la dep ban pyrshang ha kine ki khyndiat sngi bad ki la don ba ki la ioh.