Bym ioh NoC shna lynti rel Sah kut ka pisa T.209 klur ha kti u DC Ri-Bhoi

U Symbud Myntri Rangbah ka jylla u bah Sniawbahlang Dhar ula pyntip ba ka pisa T.209 klur kaba la mang ka sorkar India na bynta ban shna lynti rel, ym pat shym la lah ban pyndonkam haduh mynta. Haba jubab ia ka jingkylli ba la wanrah da u MLA ka VPP na North Shillong, u Symbud Myntri Rangbah ka jylla ula iathuh ba kane ka pisa la mang da ka sorkar India ha ka 30 tarik Lber, 2017 na bynta ban shna lynti rel, hynrei ka sorkar kam shym la lah ban pyndonkam namar ka jingpyrshah ki paidbah nongshong shnong, ka jingbym ioh jaka bad ka jingbym ioh ia ka NOC na ka District Council. “Kawei na ki daw ba ym lah ban iaid shakhmat ia kane ka projek, ka dei namar ka jingbym ioh jaka bad ka jingbym ka NOC na ka District Council, namarkata kane ka projek ka dang sahkut bad ka pisa ka sah ha kti u Deputy Commissioner ka Ri-Bhoi,” ong u Symbud Myntri Rangbah ka jylla u bah Sniawbhalang.

Haba jubab bynrap halor kane, u Myntri Rangbah ka jylla u Conrad K Sangma ula ong ba kam don eiei ka jingiakren leh buhrieh bad kane ka pisa ka dei na bynta ban siew bai jaka hynrei namar ka jingbym lah ban ioh jaka, ym shym la pyndonkam ia ka pisa. U Myntri Rangbah ula iathuh ba ka sorkar ka la ioh pdiang ia ka shithi na ka NorthEast Frontier Railway ban pynphai noh ia ka pisa namar ba ym shym lah ban pyntreikam.“Namar ka jingbym lah ban pyntreikam ia ka pisa, ka sorkar India ka la bthah ia ka sorkar jylla ba kan pynphai noh ia ka pisa,” la bynrap u Conrad.

Ha kajuh ka por, u Myntri Rangbah ula ong ba kum ka sorkar jylla ka sngew donkam ban don ka lynti rel ban kyntiew ia ka ioh ka kot ka jylla bad kan pynsuk ia ka jingshalan marbam ha ka jylla bad shabar ka jylla.“ Kum ka sorkar, ngi sngew ka donkam ban don ia ka lynti rel ban kyntiew ia ka ioh ka kot bad ki marbam ruh kin kham duna dor bad kan ai jingmyntoi ruh ia ki nongkhaii ka jylla,” ong u Conrad.