Bym ler kam ka Sorkar Pdeng, sa nud byrngem ki nong Bangladesh iaka North East

Ka jingnud ki nong Bangladesh ban byrngem ia ki Jylla ka thaiñ Shatei Lam Mihngi (North East) kadei ka sakhi jong ka jingpulom ne ka ‘Failure’ jong ka Sorkar Pdeng ba ialam da ka Bharatiya Janata Party (BJP) bad ka Sorkar Jylla ha ka kam Foreign Policy. Ïa kane la kynthoh da u President ka Meghalaya Pradesh Congress Committee (MPCC) u Bah Vincent H Pala bad ula kynnoh ruh ba ka Sorkar Pdeng kaba ïalam da ka BJP kala pulom (Fail) ha ka kam Foreign Policy ym tang bad ka Bangladesh hynrei kumjuh ha kiwei ki Ri kum ha Sri Lanka, Maldives bad Nepal.

Haba kren shaki lad pathai khubor, u Bah Pala ula kynnoh ruh ba wat kiwei ki Ri kiba don ka jingiajan bha bad ka Ri India kum ka China bad Russia ruh kila sdang ban kynriah ne jngai noh mynta namar ka jingbym ler ka Sorkar Pdeng ha ka kam Foreign Policy.U Bah Pala u la kynthoh ba ka Sorkar Pdeng ba ïalam daka BJP ka pynleit jingmut palat tang ha ka kam pyniapher jaidbynriew bad pyniapher niam namar kata kane kala ktah ia ka jingiadei jong ka India bad kiwei ki ri jong ka pyrthei.

“Ha ka por Khrismas, ki don ki jingshah thombor ki kynhun riewngeit Khristan bad ka Sorkar Pdeng ka sngap mynta hynrei lada jia kano kano ka jingeh iaki riewngeit Hindu ha Bangladesh, ka Sorkar Pdeng ka shim khia bha bad ka kylla long ka kam kaba heh bha, katba ha India pat ka jingthombor ia kiwei ka long da kawei pat ka rukom” la kynnoh u Bah Pala.U President ka MPCC u la kynthoh jur ruh ia ka Sorkar Jylla ba ialam da ka NPP da kaba ong “Ka Sorkar Jylla ba ïalam daka NPP kam lah ban leh eiei namar kan dei tang ka jing pynwit ia ka Policy jong ka BJP”.“Ka policy ka BJP bad ka NPP ka dei kajuh, ki shu byrngem bad thoh shithi hynrei kim lah ban leh eiei. Haba ki bam ha ka juh ka pliang bad thiah ha ka juh ka iing, kumno kin lah ban ieng pyrshah? ula kynthoh.