Bynñiaw u Symbud Myntri ba jurip khappud ka KHADC khlem jingtip ka Sorkar

U Symbud Myntri Rangbah ka tnat kampohiing (Police) u Bah Prestone Tynsong ula pynpaw ia ka jingbynniaw halor ka jinghiar jurip ba dang shen jong ka Khasi Hills Autonomous District Council (KHADC) ha ka thain Rani, kaba hap hapoh ka jingiakajia pud hapdeng ka Meghalaya bad Assam.
Haba kren shaki lad pathai khubor u Bah Prestone ula ong ba ka KHADC kam dei satia ban pynlong ia kane ka jingjurip khlem da pyntip ia ka Sorkar Jylla, khamtam baka jingiakajia pud ka dei kaba dang ban iapynbeit.
Lah ban kdew ba ka thain Rani ka dei shi bynta jong ka jingiakajia pud hapdeng ka Meghalaya bad Assam ha kaba ka Joint Regional Committee (JRC) na baroh artylli ki Jylla kin dang ban leit jurip ia ka thain, bad ka jingphiah ia u pud u sam ruh ka dei kaba dang sahteng. U Symbud Myntri Rangbah ula ban jur ba ki kam jong ka KHADC ka lah ban wanrah ia ka jingiakynad hapoh ka thain.
“Ha ka jingshisha, ka jingialang kaba la tyrwa ban pynlong ka long ban pynthikna la kane ka jaka ka hap ha Jirang Syiemship lane ha ka Lyngdohship ka Sohiong. Nga sngew shimet ba ka jingbakla bala leh da ka KHADC ka long ba namar ia u pud jong ki Hima ym pat lah ban pynbeit, nga sngew ba ka KHADC kam dei ban leit jurip/ Kila dei ban khot jingialang shuwa hala ka jong ka Ophis, iakren bad lum shuwa ia ki kot ki sla bad hadien ki lah ban leit jurip ha ryngkat y Lyngdoh ka Sohiong bad Syiem ka Nongspung. Nga sngew ba kane ka dei ka lynti” la ong u Bah Prestone.
“Hynrei haba iadei bad ka jingjia kaba la jia, khublei ia u Blei ba na ka liang ka Sorkar ngi la pynjari ia ka kyndon 144 CrPC lem kumta ka lah ban long da kumwei pat” bynrap u Bah Tynsong.
U Bah Prestone ula pynthikna ba ki jingiakren ki dang iaid hapdeng ki Ophisar na baroh ar Jylla, kynthup u Deputy Commissioner bad Superintendent of Police.
“Ki jingiakren ki dang iaid. Mano ba ong ba kam don satia ka jingiakren?. Ha ka kyrdan ki Deputy Commissioner bad SP bad wat ha ka kyrdan ki ADM Revenue, ka jingiakren kala don, ka dei ka jingiakren ban pynneh pynsah ia ka jingsuk bad ka shongsuk shongsain la ka dei ha Block-I, II lane ha ka Jylla baroh kawei. Ngi la bthah ba kan iaid kumta” ula ong.
‘Wat ha ka jingialang ki Myntri Rangbah bad ki Chief Secretary, kala don ka jingbthah kaba shai na baroh ar Jylla. Ta ka daw mynta, kino kino ki jingjia kiba jia, mar mar ngi la pynbeit ia ki bad la lah ban tem ia ki” bynrap u Symbud Myntri Rangbah.